Bakıya enən məşhur təyyarə AZAL-a 700 mindən çox pul ödəyəcək - İDDİA
Məlum olduğu kimi, dünyanın ən iri sərnişin təyyarəsi 2 gün əvvəl Bakıya məcburi eniş edib. Buna səbəb göyərtədə olan sərnişinlərdən birinin səhhətində yaranan qəfil pisləşmə olub.
Belə ki, "Airbus A380" tipli təyyarə saat 07:55-də (Bakı vaxtı ilə) uğurla eniş edib. Sərnişinə dərhal yerində tibbi yardım göstərilib.
Hadisənin maraqlı məqamı təyyarənin aid olmadığı hava limanında dayandığı hər 1 dəqiqə üçün 150 dollar ödəməsidir.
Bu barədə Sfera.az-a etibarlı mənbədən məlumat daxil olub.
Belə ki, bu praktika aviasiyada mümkündür və bu, "yer xidməti haqqı" və ya "uçuşa aid olmayan hava limanında dayanma cəriməsi" kimi tanınır. Əgər bir təyyarə aid olmadığı və ya əvvəlcədən razılaşdırılmamış bir hava limanında enərsə və ya uzun müddət orada park edərsə, həmin hava limanı operatoru bu təyyarədən əlavə ödəniş tələb edə bilər.
Hava gəmisinin 2 sutkadır ölkəmizdə olduğunu nəzərə alsaq, orta hesabla təyyarənin ödəyəcəyi məbləğin hələlik 432 min dollar (734 min manat) olacağı təxmin edilir. Hər keçən dəqiqə isə məbləğ artır.
Qeyd edək ki, "Airbus A380" - qlobal hava nəqliyyatında ən iri sərnişin təyyarəsi hesab olunur. İki göyərtəli və dörd mühərrikli bu hava gəmisi yüzlərlə sərnişin daşımaq imkanına malikdir və yalnız xüsusi texniki standartlara cavab verən beynəlxalq hava limanlarında eniş edə bilir.
Heydər Əliyev Beynəlxalq Hava Limanı A380 tipli hava gəmilərinə xidmət göstərə bilən müasir yerüstü avadanlıq, geniş uçuş-enmə zolaqları və yüksək səviyyəli xidmət infrastrukturu ilə təmin olunub. Bu baxımdan, Bakı hava limanı regionda bu tip hava gəmilərini qəbul etməyə tam texniki və əməliyyat hazırlığı olan azsaylı hava limanlarından biridir.
Firuzə Əliyeva
Sfera.az
