"Bu qarpızları almayın, zəhərlənəcəksiniz" - XƏBƏRDARLIQ

İyunun 7-də Bakıda 2005-ci il təvəllüdlü Dərya Şahin qızı Ağayeva zəhərlənmə diaqnozu ilə dünyasını dəyişib. Yaxınları onun qarpızdan zəhərləndiyini bildiriblər.

Bildiyimiz kimi, ölkəmizdə ilin hər fəsli qarpız tapmaq mümkündür. Bəs bu meyvənin istehlakı zamanı nələrə diqqət edilməlidir?

Mövzu ilə bağlı Sfera.az-a açıqlama verən Azad İstehlakçılar Birliyinin sədri Eyyub Hüseynov bildirib ki, Azərbaycanda əkilən qədim qarpız növlərinin kökü kəsilib. 

Onun sözlərinə görə, qədim yerli qarpızlar iri tumlu və nisbətən az şirin idi. Hazırda isə hər mövsümdə Azərbaycanda İran və başqa ölkələrdən gətirilən, istixanalarda yetişdirilən qarpızlar satışda olur. 

Ekspert nəzərə çatdırıb ki, insanların zəhərlənməsinə səbəb olan şey qarpızın tərkibindəki nitratlardır:

“Qarpız elə bir bitkidir ki, ona gübrə verməsən də, yerdə olan azotu özünə çəkir. Kənd təsərrüfatı ilə məşğul olanlar yetişdirdikləri qarpızın böyük görkəmdə olması üçün ona kifayət qədər nitratlar verirlər. Bunlar da toplanır və insanların zəhərlənməsinə gətirib çıxarır. Nitratlı qarpızlar böyük, içi bənövşəyi rəngdə, tumları xırda və daha şirin olur. Bu da istehlakçıları özünə cəlb edir. Azərbaycanda nitratı az olan qarpızların çəkisi 4-5 kq aralığındadır, içi tünd al qırmızı və zoğları nazik olur”. 

E.Hüseynov vurğulayıb ki, qarpızı çox yemək olmaz. Bu da zəhərlənməyə səbəb olub. Bütün bu amillərə diqqət edilməlidir.

Mütəxəssis əlavə edib ki, AQTA əməkdaşları kənd təsərrüfatı ilə məşğul olan adamlarla iş aparılmalıdır ki, qarpıza az gübrə versinlər, insanlar zəhərlənməsin.
 

Firuzə Əliyeva 
Sfera.az