İnsanlar benzin qoxusunu nə üçün sevir? - ARAŞDIRMA

Bəzi insanlar üçün benzin qoxusu yalnız yanacaq stansiyalarında rast gəlinən bir qoxu deyil. Bu həm də nostalji, rahatlıq və hətta xoşbəxtlik hissi ilə əlaqələndirilən duyğusal bir stimuldur.

Sfera.az xəbər ki, son illərdə sosial mediada tez-tez gündəmə gələn bu mövzu alimlərin də diqqətini cəlb edib. Benzin tərkibindəki kimyəvi maddələr xüsusilə benzol beyindəki dopamin sistemini qısa müddətli stimullaşdıraraq insanda xoş bir hiss yarada bilər.

Bəzi insanlar bu qoxunu uşaqlıq xatirələri, ailə ilə yol səfərləri və ya avtomobil ustalarının yanında keçən günlərlə əlaqələndirir. Beyində bu tip emosional reaksiyalar əsasən limbik sistem (emosiyalar və yaddaşla bağlı hissə) tərəfindən idarə olunur.

Bu qoxuya maraq həm də beyindəki hipokampus və amigdala bölgələrinin aktivləşməsi ilə bağlıdır. Bu bölgələr emosional yaddaş və davranış reaksiyalarını tənzimləyir. Nəticədə, benzin qoxusu insan beynində həm nostalji, həm də “xoş duyğu” kimi qəbul oluna bilir.

Lakin alimlər xəbərdarlıq edirlər: benzin qoxusunu məqsədli şəkildə və tez-tez iyləmək təhlükəlidir. Benzin tərkibindəki bəzi maddələr uzunmüddətli iylənmə zamanı sinir sisteminə zərər verə, başgicəllənmə, huşsuzluq və hətta asılılıq yarada bilər.

Mütəxəssislərin fikrincə, bu qoxuya olan maraq insan təbiətinin sensor və emosional yönlərini üzə çıxarır. Lakin bu marağın təhlükəli sərhədləri keçməməsi vacibdir.

Fidan Hacızadə
Sfera.az