Erkək qoyun, camış, dəvə...- Qurban bayramı dünyada necə qeyd olunur?

İslam dünyasının ən müqəddəs bayramlarından olan Qurban Bayramı bu il də dünyanın müxtəlif ölkələrində maraqla ilə qarşılanır.

Sfera.az xəbər verir ki, bayram münasibətilə milyonlarla müsəlman qurban kəsərək dini və sosial borclarını yerinə yetirir. Hər ölkədə bayramın qeyd olunma forması və kəsilən heyvanlar fərqli olsa da, ortaq məqsəd eynidir : paylaşmaq və yaxınlaşmaq.

Qurban Bayramı Səudiyyə Ərəbistanı, BƏƏ, Qətər, Pakistan, Hindistan, Banqladeş, İndoneziya, Misir, Nigeriya, Türkiyə, İran və Afrikanın bir çox ölkəsində rəsmi bayram kimi qeyd olunur. Eyni zamanda Avropa və Amerika ölkələrində yaşayan müsəlman icmaları da bayramı dini qaydalar əsasında keçirirlər.

Banqladeşdə keçən il təxminən 10 milyon heyvan qurban kəsilib. Statistikaya əsasən, bunların arasında 4,7 milyon inək, 5 milyon keçi, 471 min qoyun və 112 min camış yer alıb.

Pakistanda keçən il 8 milyondan çox qurban kəsilib. Onların arasında 300 min inək, 1 milyon qoyun, 100 min dəvə və digər növlər var idi.

İndoneziyada əsasən keçi və inəklər qurban kəsilir. Bayramdan öncə heyvan bazarlarında ciddi canlanma müşahidə olunur.

Nigeriyada isə daha çox erkək qoyun seçilir. Daha varlı təbəqələr inək və dəvə qurban edir.

Hindistanda, xüsusilə “Bakrid” adlandırılan bayramda əsas qurbanlıq heyvan keçidir.

Misir və Mərakeşdə isə ənənəyə uyğun olaraq qoyun və keçilər qurban edilir. Qurbanlıq heyvanların buynuzlarına xına çəkilməsi qədim adətlərdəndir.

Qeyd edək ki, Azərbaycanda Qurban bayramı 6-9 iyun tarixlərində qeyd olunacaq. Ölkəmizdə qurban mərasimlərində qoyun, qoç, inək, dana , keçi və ya dəvə kəsilir

Qurban Bayramı yalnız dini ayinlərlə deyil, həm də paylaşmaq və ehtiyac sahiblərinə yardım etmək ruhu ilə keçirilir. Ailələr birlikdə dua edir, bayram süfrələri qurur və qurban ətlərini qonşularla bölüşürlər.

Fidan Hacızadə
Sfera.az