Bu ölkələrə köçənlərə pul verilir - DETALLAR
Bir sıra ölkələr, az əhali yaşayan kənd və kiçik şəhərlərin canlandırılması məqsədilə xaricdən köç edənlərə müxtəlif maliyyə təşviqləri və sosial dəstəklər təqdim edir.
Sfera.az “valyuta.az”a istinadən xəbər verir ki, bu təşəbbüslər çərçivəsində köçən şəxslərə ev, torpaq, vergi güzəştləri və nağd vəsait təklif olunur.
"İtaliya" - "1 avroluq evlər" və 10 min avroya qədər təşviqlər
Cənubi İtaliyadakı bir çox kəndlərdə əhali sayı sürətlə azalır. Bu səbəbdən hökumət "1 Euro homes" proqramı vasitəsilə boş qalmış evləri simvolik qiymətlərlə satışa çıxarır. Bəzi hallarda, ev təmirinə və orada yaşamağa başlayanlara 10 000 avroya qədər nağd dəstək də verilir. Proqramın şərtlərinə əsasən, köçən şəxslər müəyyən müddət ərzində həmin evdə yaşamalı və onu təmir etməlidirlər.
"İrlandiya" - kəndlərə köçən uzaqdan çalışanlara qrantlar
"Our Rural Future" proqramı çərçivəsində İrlandiyanın kənd ərazilərinə köçmək istəyən uzaqdan çalışan şəxslərə infrastruktur və maliyyə dəstəyi göstərilir. Proqramda iştirak üçün əsas şərt, uzaqdan işləmək və kənd bölgəsində yaşamaqdır.
"Kanada" - kənd və şimal bölgələrə immiqrasiya təşəbbüsü
"Rural and Northern Immigration Pilot" proqramı vasitəsilə Kanada, müəyyən kənd və kiçik şəhərlərə köç edənlərə yerləşmə yardımı, iş tapmaq dəstəyi və vergi güzəştləri təqdim edir. İştirakçılar müvafiq bölgələrdə fəaliyyət göstərən işəgötürənlə əməkdaşlıq etməlidirlər.
"ABŞ" - bəzi ştatlarda 10 min dollara qədər köç təşviqləri
"Vermont", "Kansas" və "Oklahoma" kimi ştatlarda həyata keçirilən "Remote Worker Incentives" proqramları çərçivəsində uzaqdan çalışan şəxslərə 10 000 ABŞ dollarına qədər köç dəstəyi, vergi endirimləri və ev almaq üçün maliyyə yardımı təklif olunur. Əsas şərt, müəyyən bölgələrə köçmək və həmin ərazidə yaşamaqdır.
"Yaponiya" - boş kənd evləri və ailələrə nağd dəstək
"Akiya" (boş evlər) proqramı çərçivəsində Yaponiya kənd yerlərində tərk edilmiş evləri köçmək istəyən şəxslərə təqdim edir. Uşaqlı ailələr üçün bəzi bölgələrdə 10 000 ABŞ dollarına qədər maliyyə dəstəyi nəzərdə tutulur. Proqram iştirakçılarından uzunmüddətli yaşamaq və yerli cəmiyyətə inteqrasiya olunmaq tələb olunur.
"Portuqaliya" - Madeyrada rəqəmsal köçərilər kəndi
"Digital Nomad Village" təşəbbüsü, uzaqdan çalışan şəxsləri Madeyra adasına cəlb etmək məqsədi daşıyır. Proqram çərçivəsində vergi güzəştləri, pulsuz ofis məkanları və yaşayış dəstəyi təqdim olunur. İştirakçılar müəyyən müddət ərzində adada yaşamalıdırlar.
"Yunanıstan" - Antikifira adasına köçənlərə aylıq ödəniş və ev Yunanıstanın Antikifira adasında əhali sayının artması üçün həyata keçirilən təşəbbüs çərçivəsində köçən ailələrə 3 il ərzində aylıq təxminən 500 avro ödəniş, həmçinin ev və torpaq dəstəyi verilir. Proqramın əsas şərti ailə ilə birlikdə köçmək və uzun müddət yaşamaqdır.
