Hər il 2 iyun Azərbaycanda Mülki Aviasiya İşçilərinin Peşə Bayramı kimi qeyd olunur.

Sfera.az bildirir ki, bu əlamətdar gün Azərbaycan Respublikasının Prezidenti İlham Əliyevin 2006-cı il 18 may tarixli Sərəncamı ilə təsis edilib. Bu tarix təsadüfi seçilməyib, məhz 1938-ci il 2 iyun tarixində Azərbaycanda mülki aviasiyanın təməlini qoymuş ilk aviasiya qrupunun yaradıldığı gündür. Azərbaycan mülki aviasiyasının inkişafı Bakıdan Moskva, Xarkov, Tbilisi və Həştərxana hava xətləri açılması, sərnişinlərin və poçtun təyyarələr ilə daşınması ilə başlayıb. Böyük Vətən müharibəsi dövründə mülki aviasiya sektoru da “Hər şey cəbhə üçün!” şüarı ilə fəaliyyət göstərib.

Müharibədən sonrakı illərdə “İL-14”, “İL-18” sərnişin təyyarələri, “An-2” təyyarələri, “Mi-1” və “Mi-4” vertolyotları istismara daxil edilib. Bu inkişaf mərhələsi 1970-ci illərə qədər davam edib. 1970-1980-ci illər ölkədaxili hava xətlərinin inkişaf mərhələsi olub. Gəncə, Yevlax, Naftalan, Naxçıvan, Zaqatala, Lənkəran, Ağdam, Ağstafa və Şəki şəhərlərində aeroportlar tikilərək, Bakı ilə hava əlaqəsi yaradılıb. Azərbaycan müstəqilliyini yenidən bərpa etdikdən sonra mülki aviasiya sahəsində yaranan boşluqlar Ümummilli Lider Heydər Əliyevin hakimiyyətə qayıdışından sonra aradan qaldırılıb. Ulu Öndərin sərəncamları və qəbul etdiyi qərarlar mülki aviasiyada yeni inkişaf mərhələsinin başlanmasına zəmin yaradıb. Müasir təyyarələr, texniki avadanlıqlar əldə olunub, beynəlxalq tələblərə cavab verən aviasiya infrastrukturu formalaşıb. 1999-cu ildə Heydər Əliyevin təşəbbüsü ilə Bakıda müasir beynəlxalq aerovağzal kompleksi istifadəyə verilib. Bir il sonra ilk “Boeing” təyyarəsi Bakı hava limanına enib. 2004-cü ildə isə hava limanı Heydər Əliyev Beynəlxalq Aeroportu adını alıb. Bu aeroport postsovet məkanında ən yaxşı aeroport elan edilib, nüfuzlu “Skytrax World Airport” mükafatlarına və “5 ulduz” reytinqinə layiq görülüb. Dünya üzrə belə aeroportların sayı 10-a yaxındır — onlardan biri də məhz Heydər Əliyev Beynəlxalq Aeroportudur.

Peşəkar kadr hazırlığı məqsədilə 1992-ci ildə Azərbaycan Milli Aviasiya Akademiyası yaradılıb. Bununla yanaşı, mülki aviasiyanın yenidən qurulması üzrə Naxçıvan beynəlxalq hava limanı, Zabrat hava limanında yeni aerovağzal binası, Qəbələ, Lənkəran, Zaqatala və Gəncə beynəlxalq hava limanları sərnişinlərin istifadəsinə verilib.

Azərbaycanda mülki aviasiya sahəsində dövlət siyasətinin həyata keçirilməsi və tənzimlənməsi Dövlət Mülki Aviasiya Agentliyi tərəfindən təmin edilir. Agentlik dövlət siyasətinin formalaşdırılmasına və icrasına nəzarət edir, mülki hava gəmilərinin təhlükəsiz uçuşunu və ətraf mühitin qorunmasını təmin edir. Həmçinin, hava məkanından istifadə qaydalarının və digər normativ hüquqi aktların hazırlanmasında iştirak edir, xarici ölkələrin hava gəmilərinə ölkəmizin hava limanlarına uçuşlar üçün icazələr verir. Bunlardan başqa, müfaviq beynəlxalq təşkilatlarla, o cümlədən Beynəlxalq Mülki Aviasiya Təşkilatı (ICAO) və digər qurumlarla əməkdaşlıq edir, aviasiya hadisələrinin araşdırılmasında və qanunvericilik aktlarının hazırlanmasında iştirak edir. Azərbaycanın mülki aviasiyası Beynəlxalq Mülki Aviasiya Təşkilatının (ICAO) standartlarına tam cavab verir.

Eyni zamanda, “Azərbaycan Hava Yolları” QSC (AZAL) Beynəlxalq Hava Nəqliyyatı Assosiasiyasının (IATA) üzvüdür. AZAL və onun tabeliyindəki “Buta Airways” bu gün “Airbus”, “Boeing” və “Embraer” təyyarələri ilə dünyanın 25 ölkəsinə və 40 istiqamətə yüksək komfortlu uçuşlar həyata keçirir. Bakı ilə yanaşı, Gəncə, Lənkəran, Qəbələ və Naxçıvandan da beynəlxalq uçuşlar təşkil olunur. Son nəticədə, Azərbaycanın hava xidmətləri Dünya İqtisadi Forumunun hesabatında 11-ci yerə yüksəlib, bu da ölkəmizin aviasiya sahəsində əldə etdiyi uğurların bariz göstəricisidir. Bu əlamətdar gündə bütün mülki aviasiya işçilərini təbrik edir, onlara təhlükəsiz uçuşlar, uğurlar və firavan xidmət arzulayırıq!

Firuzə Əliyeva

Sfera.az

İyunun 2-si Azərbaycanda Mülki Aviasiya Günüdür