Yuxuda heç tanımadığınız, amma bir o qədər də real görünən insanları görmüsünüzmü? Psixoloqlar və neyroelm mütəxəssisləri bu qeyri-adi fenomenin səbəblərini araşdıraraq maraqlı nəticələrə gəliblər. Beyin, heç fərqində olmadığımız insan simalarını yadda saxlayaraq yuxularımızda “yenidən işə salır”.

Sfera.az xəbər verir ki, alimlər bildirirlər ki, insan beyni gündəlik həyatda qarşılaşdığı, metroda, küçədə, televiziya ekranında gördüyü minlərlə simanı şüurlu şəkildə xatırlamasa da, şüuraltı yaddaş bu məlumatları “arxiv” kimi qoruyur. Məhz bu arxiv yuxular zamanı aktivləşərək tanımadığımız, amma reallıqda bir anda rastlaşdığımız insan simalarını ortaya çıxarır.

Stanford Universitetində aparılan bir araşdırmada iştirakçılara müxtəlif xarici görünüşə malik yüzlərlə insanın şəkli göstərilib və sonradan onların yuxu məzmunları izlənilib. Nəticədə bəlli olub ki, iştirakçılar yuxularında daha əvvəl qısa müddətlik göstərilən, lakin xatırlamadıqları bu simaları “tanımadıqları insanlar” kimi görüblər.

Mütəxəssislər bu fenomenin beyin yaradıcılığı ilə bağlı olmadığını, əksinə, mövcud vizual yaddaşdan istifadə etdiyini deyirlər. Yəni yuxularımızda uydurduğumuzu düşündüyümüz insanlar, əslində, bir vaxtlar real həyatda rastlaşdığımız şəxslər ola bilər.

Araşdırmalar həmçinin göstərir ki, yuxuda görünən bu simalar bəzən beyin üçün mesaj daşıyıcısı rolunu oynayır. Şüuraltı, müəyyən duyğuları və düşüncələri həmin tanımadığımız simalar vasitəsilə simvolik formada ifadə edir.

Maraqlıdır ki, bu fenomen yalnız vizual yaddaşla məhdudlaşmır. Bəzən yuxularda eşitdiyimiz səslər, danışıq tərzləri və jestlər də real həyatda rast gəlinmiş, amma unudulmuş detallardan ibarət ola bilər.

Bu araşdırma bir daha sübut edir ki, insan beyni o qədər mürəkkəb və çoxqatlı işləyir ki, bəzən gördüyümüz ən absurd yuxuların da real həyatla görünməz bağları ola bilər.

Fidan Hacızadə
Sfera.az

Yuxu ilə bağlı YENİ KƏŞF - BU ŞƏXSLƏRİ GÖRMƏK...