Boşanmış qadınlar uğursuz olur? - PSİXOLOQ RƏYİ
Gənc yazıçı Kəramət Böyükçöl deyib ki, boşanmış uğurlu qadın nümunəsi yoxdur. Onun sözlərinə görə, bir kişinin sözünü götürə bilməyən qadın gedir boşanır, kafedə işləyir və 50 kişinin sözünü götürür.
Sfera.az xəbər verir ki, mövzuya münasibət bildirən psixoterapevt Aysel Məmmədova Kəramət Böyükçöl kimi ictimai simaların bu cür fikirlər səsləndirməsinin daha da təhlükəli olduğunu vurğulayıb.
Psixoterapevt qeyd edib ki, onun sözləri bir çox insan üçün nümunəyə çevrilir:
“Belə fikirlər zorakılığa, qadın hüquqlarının pozulmasına, onların seçim azadlığının əlindən alınmasına zəmin yaradır. Bu sözlərə əl çalan, alqışlayan insanlar əslində cəmiyyətin qadına qarşı sərt münasibətini və savadsızlıq səviyyəsini üzə çıxarır. Onlar qadını yalnız ailə daxilində itaətkar varlıq kimi görmək istəyir, onun sosial güc qazanmasından qorxurlar. Bu düşüncə ilə inkişaf edən bir cəmiyyətin gələcəyi qaranlıqdır. Bu cümlə qadını yalnız kişinin itaətkarı kimi görən, onun iradəsini kişi sözünə tabe etməkdən başqa yol tanımayan geridəqalmış patriarxal düşüncənin məhsuludur. Burada qadının insan kimi seçimi, iradəsi, peşə azadlığı, şəxsiyyəti yox sayılır. Onun “bir kişinin sözünü götürməməsi” günah, “min kişinin sözünü götürməsi” isə alçaldıcı bir obraz kimi təqdim olunur”.
A.Məmmədovanın sözlərinə görə, bu kimi ifadələr qadınların azadlıq, həyatını dəyişmək və travmalardan çıxmaq kimi mühüm qərarlarını kiçildərək, onları utanmağa və öz seçimlərinə görə peşmanlıq hiss etməyə məcbur edir. Bu, özünə dəyər hissinin azalması, təqsir hissi və özünü ittiham, cəmiyyətə qarşı inamsızlıq, peşə və sosial azadlıqdan imtina kimi psixoloji təsirlərə səbəb ola bilər.
Firuzə Əliyeva
Sfera.az
