Piylənmə valideyndən uşağa ötürülür - TƏDQİQAT

Finlandiyanın Helsinki Universitetində aparılan araşdırmaya görə, orta yaş dövründə arıqlamaq uzunmüddətli sağlamlığı təmin edir.

Sfera.az xarici mediaya istinadən xəbər verir ki, tədqiqatın aparıcı müəllifi Timo Strandberqin sözlərinə görə, dərman və ya cərrahi müdaxilə olmadan bədən çəkisinin təxminən 6,5 faiz azaldılması insan sağlamlığına mühüm təsir göstərir.

Araşdırmanın nəticələrinə əsasən, orta yaşda arıqlayan insanların sonrakı illərdə infarkt, insult, xərçəng, astma və xroniki obstruktiv ağciyər xəstəliyinə tutulma riski əhəmiyyətli dərəcədə azalır. Eyni zamanda, onların 35 il ərzində hər hansı xəstəlikdən erkən ölüm ehtimalı da daha aşağı olur.

Alimlər bildirirlər ki, qocalıqda sağlam qalmaq istəyən hər kəs artıq çəkidən xilas olmağa orta yaş dövründən başlamalıdır.

Norveçin Sauthempton və Bergen universitetlərinin birgə araşdırması ataların çəkisinin genetik yolla övladlara ötürüldüyünü ortaya qoyub. Araşdırma çərçivəsində 339 ata və onların övladlarının DNT-si təhlil edilib. Nəticələr göstərib ki, yeniyetməlik dövründə həddindən artıq kökəlmiş kişilərin uşaqlarında piylənmə və astma riski daha yüksəkdir.

Tədqiqatçılar uşaqlarda piy hüceyrələrinin yaranması və yağ mübadiləsi ilə bağlı 1962 gendə DNT dəyişiklikləri müəyyən ediblər. Bu dəyişikliklər piylənmənin genetik yolla növbəti nəsillərə ötürülməsi ehtimalını artırır.

Mütəxəssislər xəbərdarlıq edirlər ki, artıq çəki yalnız fərdi sağlamlığa deyil, gələcək nəsillərin də sağlamlığına birbaşa təsir göstərir.

Fidan Hacızadə
Sfera.az