Bakıda avtomobil yükünün yüksəlməsi parkinqlərin az olması fonunda paytaxt küçələrindəki sıxlıq gün keçdikcə artır. Bu yollardan biri də Yasamal rayonu, Qələbə dairəsindən Tbilisi prospektinə gedən Əbdülvahab Salamzadə küçəsidir.

Belə ki, bu yolun sağ zolağı boyunca dayanma və durma qadağandır nişanı olsa da, davamlı avtomobillər parkinq edir, bu da hərəkəti məhdudlaşdırır. Xüsusən də, tıxacın pik səviyyədə olduğu səhər və axşam saatlarında yolun bir hissəsinin bu şəkildə tutulması sürücülər üçün çətinlik yaradır.

Bəs bunun qarşısı necə alınmalıdır?

Mövzu ilə bağlı Sfera.az-a açıqlamasında nəqliyyat eksperti Elməddin Muradlı bildirib ki, problemə əsas səbəb nəzarətdəki boşluqdur:

“Görüntülərdən də görünür ki, nişan heç bir işə yaramır, nişanın təsir zonasında maşınlar ucdan-uca dayanıb. Həmin ərazi Yasamal Rayon Polis İdarəsi və Dövlət Yol Polisi Şöbəsinin qarşısında yerləşir. Görünür, nəzarətdə boşluq yaranıb ki, sürücülər də bundan istifadə edirlər. Həqiqətən də, sözügedən yol olduqca əhəmiyyətlidir. Təbii ki, dayanma və durma qadağandır nişanının əhatə dairəsində olan avtomobillər digər avtomobillərin hərəkətini çətinləşdirir, sıxlıq və tıxac yaradır, ya da ümumiyyətlə yoldan istifadəni mümkünsüz edir. Bu səbəbdən həmin əraziyə polis nəzarəti lazımdır. Bəzi yerlərdə hansısa formada müəyyən parklanma nöqtəsi yaradıla bilər”.

Saytımıza açıqlamasında nəqliyyat eksperti Aslan Əsədov bildirib ki, yol kənarlarında parkinqə qadağa qoyulmaqdansa, vətəndaşlar özləri bu məsələdə anlayışlı olmalıdır:

“Ümumiyyətlə, küçə və prospektlərin kənarında dayanma və durmanın qadağan edilməsi, müəyyən maneələrin qoyulması doğru addım deyil. Ən azından, vətəndaşlar müəyyən qədər anlayış göstərməlidir. Yollar elə də geniş deyil, parkinq üçün çox yer ayrılmayıb, bu o demək deyil ki, hər bir şəxs yol hərəkəti qaydalarına etinadsız yanaşmalıdır. Hər kəs bilməlidir ki, yol hərəkətinin iştirakçısıdır, yola laqeyd münasibət göstərməməlidir. Bu kimi amillər insanlarda mənfi emosiyaların yaranmasına gətirib çıxarır ki, bu da qanuna hörmətsizlik kimi özünü biruzə verir. Hər bir vətəndaş öz yaşadığı dövlətin qanunlarına riayət etməyə borcludur. Əks halda, belə xoşagəlməz faktlar ortaya çıxa bilir”.

Bakı Şəhər Dövlət Yol Polis İdarəsinin bölmə rəisi Toğrul Nəsirli soğrumuza cavabında bildirib ki, bu barədə tədbirlər həyata keçirilir:

“Qeyd edilən ərazidə dayanma və durma qaydalarını pozaraq yolun buraxıcılıq qabiliyyətinin aşağı düşməsinə, eləcə də, yol-nəqliyyat hadisəsinin baş verməsinə real zəmin yaradan sürücülərlə bağlı qanunamüvafiq tədbirlər həyata keçirilir. Sürücülərdən xahişimiz, eyni zamanda tələbimiz ondan ibarətdir ki, dayanma və durma qaydalarına düzgün şəkildə riayət etsinlər, ərazidə sıxlığın yaranmasına səbəb olmasınlar”.

Firuzə Əliyeva
Sfera.az

Dayanma və durma qadağandır, amma... – Yasamalda yol niyə tutulur?