Yeni aparılmış elmi araşdırma valideynlərin, xüsusilə də anaların körpələrin beyin inkişafında düşündüyümüzdən daha böyük rol oynadığını ortaya çıxarıb.

Sfera.az xəbər verir ki, ABŞ-nin “PNAS” (Proceedings of the National Academy of Sciences) elmi jurnalında dərc edilən tədqiqatda bildirilir ki, ana səsi hələ ana bətnindəki dövrdə dölün beyin strukturlarının formalaşmasına birbaşa təsir göstərir.

Tədqiqat nəticələrinə əsasən, ana bətnindəki körpələr ətraf səslərə deyil, ən çox ana səsinə və onun emosional tonuna reaksiya verirlər. Bu səsin ahəngi və təkrar olunması körpənin beyində spesifik sinir əlaqələrinin yaranmasına səbəb olur. Mütəxəssislər bildirirlər ki, bu erkən təsirlər gələcəkdə uşağın emosional sabitliyi, stressə davamlılığı və sosial bacarıqları ilə birbaşa əlaqəlidir.

Araşdırmanın müəlliflərindən neyrobioloq Elena Martinez bildirib: “Aparılan testlər sübut etdi ki, körpənin beynində bəzi neyron şəbəkələr məhz ana səsinə uyğunlaşaraq formalaşır. Bu, sadəcə bir tanıma refleksi deyil, uşağın emosional yaddaşının və psixoloji dayanıqlığının təməlidir”.

Tədqiqat həmçinin göstərib ki, doğuşdan dərhal sonra körpənin beyni ana səsinə qarşı daha güclü reaksiya verir və bu səs digər səslərdən ayırd edilə bilir. Əgər ana hamiləlik dövründə sakit və sevgi dolu şəkildə danışırsa, bu, körpədə daha stabil emosional reaksiya və aşağı stres səviyyəsi ilə nəticələnir. Əks halda, davamlı gərgin və narahat səs tonu körpənin gələcəkdə anksiyete və diqqət pozuntusu riskini artırır.

Psixoloqlar bu araşdırmanı yalnız elmi baxımdan deyil, həm də ailə münasibətləri və valideynlik psixologiyası üçün önəmli bir dönüm nöqtəsi hesab edirlər. Mütəxəssislər valideynlərə, xüsusilə də analara hamiləlik dövründə körpə ilə pozitiv və sakit ünsiyyət qurmağı tövsiyə edirlər.

Tədqiqatın müəllifləri gələcəkdə bu sahədə daha genişmiqyaslı və müxtəlif mədəniyyətləri əhatə edən tədqiqatların aparılmasının vacib olduğunu bildirirlər.

Fidan Hacızadə
Sfera.az

Ana səsi körpə beynində mühüm yer tutur - YENİ ARAŞDIRMA