"Ölkəmizin iqtisadiyyatı və ekologiyasına nə qədər ziyan vurduğumuzu görəcəyik" - Zahid Oruc

"İstiliktəchizat qurumunun durumu bizi narahat etməlidir".

Sfera.az xəbər verir ki, bunu Milli Məclisin bu gün keçirilən plenar iclasında deputat Zahid Oruc deyib.

Deputat bildirib ki, Xətai rayonunun ərazisində qarşılaşılan çətinliklər onu deməyə əsas verir ki, ölkəmizdə bütün yeni tikintilərdə vahid norma bərqərar edilməlidir:

"Hər bina, yaxud çox bloklu yaşayış massivlərinin hamısı məhz qeyd etdiyimiz şəkildə qazanxana sistemini qurmalıdır. Lakin əvəzində bizdə olan məlumata görə, istiilik təchizatı qurumunu hissə-hissə ləğv edirlər. Əgər biz bütün ölkəmizdə yalnız  100 minlərlə kombi quraşdırmaq üçün münbit zəmin hazırlayırıqsa, onda nəniki indi, o cümlədən enerji keçidi və enerji səmərəliliyi ilə bağlı gələcəkdə bərpa olunan enerjinin ev təsərrüfatlarına çatdırılması zamanı qarşımızda utulizasiya ehtiyacı olan 100 minlərlə kombi tullantısını görəndə başa düşəcəyik ki, ölkəmizin iqtisadiyyatı və ekologiyasına nə qədər ziyan vurmuşuq. 

Ümidvarıq ki, Hökumət tərəfindən qarşıdakı dövrün tikinti siyasətində və normalarında müvafiq dəyişikliklərin edilməsində parlamentlə birgə təcili addımlar atacaqdır",- millət vəkili qeyd edib.

Firuzə Əliyeva
Sfera.az