Bu şəxslərə 700 manat müavinət ödənilib

İnsan alveri qurbanlarının müdafiəsi, bu istiqamətdə hüquqi, sosial-iqtisadi tədbirlərin məqsədyönlü icrası diqqətdə saxlanılıb.

Sfera.az xəbər verir ki, bu, Milli Məclisin bu gün keçirilən plenar iclasında müzakirəyə çıxarılan “İnsan alverinə qarşı mübarizə üzrə Milli Koordinatorun illik məlumatı”nda (2024-cü il) əksini tapıb.

Qeyd edilib ki, onlardan 80 (2023-cü illə müqayisədə 10 nəfər az) nəfərinin hər birinə 700 manat birdəfəlik müavinət ödənilmiş, 56 (2023-cü illə müqayisədə 12 nəfər az) nəfəri müvəqqəti yaşaması üçün Daxili İşlər Nazirliyinin müvafiq sığınacağına yerləşdirilərək tibbi (HİV, AİDS, ginekoloji, terapevt), sosial, psixoloji, hüquqi və digər yardımlarla təmin edilmişdir. Daha 18 qurban peşə kurslarına yönəldilmiş, 9 nəfəri işlə təmin edilmiş, 1 əcnəbi qurbanın repatriasiyasında, 9 qurbana şəxsiyyət vəsiqəsi və 11 qurbanın ünvanlı sosial yardım almasında, 2 uşaq qurbanın təhsilini davam etdirməsi üçün İnteqrasiya təlimli internat məktəbinə qəbul olunmasında köməklik edilib, 44 qurbanın ailəsinə qayıdışı təmin olunub.

Əmək və Əhalinin Sosial Müdafiəsi Nazirliyi yanında Sosial Xidmətlər Agentliyinin İnsan alveri qurbanlarına Yardım Mərkəzinə istiqamətləndirilmiş 63 qurbandan 36-na psixoloji, 13-nə hüquqi yardım göstərilmiş, 3-ü peşə kurslarına cəlb edilməsi və 3 nəfər işlə təmin olunması üçün Dövlət Məşğulluq Agentliyinə istiqamətləndirilmiş, 3 qurbanın övladları isə məktəb ləvazimatları ilə təmin edilmişdir.

Vətəndaş müraciətləri əsasında və QHT-lər tərəfindən istiqamətləndirilmiş 17 potensial qurban da lazımi qayğı ilə əhatə olunmuş, habelə 88 (2023-cü illə müqayisədə 10 nəfər az) qurbana və potensial qurbana Daxili İşlər Nazirliyinin müvafiq Kömək Fondu hesabına 5.050 (-250) manat məbləğdə maddi yardım edilib.

Vəkillər Kollegiyasının üzvləri tərəfindən ümumilikdə 98 qurbana, o cümlədən 70 nəfərinə məhkəmə baxışında və 28 nəfərinə istintaq prosesində hüquqi yardım göstərilib. Qurbanların uşaqları da diqqətdə saxlanılaraq 16 nəfəri tədris ləvazimatı ilə, 12 nəfəri doğum haqqında şəhadətnamə ilə təmin olunmuş, 10 uşaq məktəbəqədər təhsil proqramına cəlb edilmiş, daha 10 nəfərinin aliment alması təşkil olunub.

Firuzə Əliyeva
Sfera.az