Bakı şəhəri, Səbail rayonu, Mikayıl Hüseynov küçəsi, 14 ünvanında yerləşən, 9 mərtəbəli yaşayış binasının yararsız hala salınması üçün işlər getdiyi iddia olunub.

Sfera.az-ın məlumatına görə, bu barədə Oxu.Az-a şikayət ünvanlayan sakinlər məlumat veriblər.

Onlar bildiriblər ki, yaşadıqları bina qəzalı vəziyyətdə olmamasına baxmayaraq, oranı tərk etmələri üçün yararsız hala salınır:

"Yaşadığımız bina uzun müddətdir istismardadır. 2011-ci ildə Fövqəladə Hallar Nazirliyi binanı yoxlayıb və onun texniki cəhətdən əla vəziyyətdə olduğunu bildirib, əlavə mərtəbənin inşasına razılıq verilib. Sonradan bu işlər dayandırılıb. 2014-cü ildə Bakı Şəhər İcra Hakimiyyəti binanın qəzalı vəziyyətdə olduğunu elan edərək sakinlərin təxliyəsini tələb edib. Bu qərarla razılaşmayaraq məsələni məhkəməyə təqdim etdik. 2015-ci ildə Dövlət Şəhərsalma və Arxitektura Komitəsinin tabeliyindəki "Bakı Dövlət Layihə İnstitutu" tərəfindən araşdırmaya başlanılıb, 2016-cı ildə nəticə olaraq binanın yalnız kosmetik təmirə ehtiyacı olduğu rəsmən təsdiqlənib.

2025-ci ilin aprel ayında Səbail Rayon İcra Hakimiyyətinin nümayəndəsi binamıza gələrək, ərazidə dövlət layihəsinin planlaşdırıldığını bildirib və şifahi olaraq statistik orta dəyərdən dəfələrlə az qiymət təklif edilib. Ancaq bu barədə bizə heç bir rəsmi sənəd, təklif və ya alternativ variant təqdim edilməyib.

Əgər bizim binamız sökülərək yerinə yenisi inşa ediləcəksə, həmin binada mənzil ilə təmin olunmağımızı istəyirik".

Sakinlər qeyd ediblər ki, uzun illərdir binanın yanındakı köhnə hərbi hospitalın yerində bina tikilməsi planlaşdırılır:

"Hətta binanın sağ tərəfində PMD şirkətinə məxsus yeni bina inşa olunması üçün hazırlıq işləri aparılır. Bu səbəbdən düşünürük ki, binamız heç bir dövlət layihəsinə daxil edilməyib, əksinə, onun kommersiya maraqları naminə sökülməsi istənilir.

Son günlərdə isə daha narahatedici hallar müşahidə olunur. Binanın infrastrukturu naməlum şəxslər vasitəsilə dağıdılır, metal konstruksiyalar sındırılıb daşınır, sakinlərə qarşı psixoloji təzyiqlər göstərilir. Bildirilir ki, yaxın zamanda liftlərin işi dayandırılacaq. Qəsdən su və kanalizasiya xətlərini zədələyirlər. Bütün bunlar bizim və ailələrimizin təhlükəsizliyini ciddi şəkildə təhdid edir.

Hətta ötən gün həftəsonu olmasına baxmayaraq, binaya gələrək birinci mərtəbədə - mağaza və obyektlərin yerləşdiyi hissədə dağıntı işləri görüblər.

2014-cü ilin qərarını əsas gətirirlər. Biz həmin qərarı vaxtilə məhkəmədə şikayət edib udmuşuq. İndi hansı qərardan söhbət gedir? Üstündən artıq 11 il keçib, indi xatırlayırlar ki, bina qəzalıdır? Bizim bina "Bakı şəhərinin 2040-cı ilədək inkişafına dair Baş planı"nda da yaşayış sahəsi olaraq göstərilib.

"Biz heç bir maddi vəsait tələb etmirik. Yeganə istəyimiz odur ki, əgər binamız doğrudan da hər hansı layihəyə daxil ediləcəksə, bu zaman bina sakinləri ədalətli şəkildə yeni tikiləcək binada və ya uyğun ərazidə mənzillə təmin edilsinlər. Çünki illərdir bu binada yaşayırıq və şəhərin mərkəzində, ailələrimizlə birgə qurduğumuz həyatın qorunmasını istəyirik".

Məsələ ilə bağlı Səbail Rayon İcra Hakimiyyətindən Oxu.Az-ın sorğusuna cavab olaraq bildirilib ki, sözügedən ərazidə hər hansı layihə əsasında tikinti işləri aparılmayacaq:

"Aidiyyəti qurumların 2014-cü ildə müvafiq qərarları əsasında sözügedən yaşayış binasının köçürülməsi Səbail Rayon İcra Hakimiyyətinə həvalə edilib.

Əlavə olaraq qeyd edirik ki, həmin ünvanda gələcəkdə hər hansı layihə əsasında tikinti işlərinin aparılması ilə bağlı Rayon İcra Hakimiyyətində məlumat mövcud deyil".

Bina sakinlərinin 2014-cü ildə yaşayış binasının köçürülməsi ilə bağlı qərardan məhkəmə şikayəti verdikləri, udduqları, hazırda hansı qərar əsasında binada köçürülmə işlərinin aparılması ilə bağlı suallarımız isə cavabsız qaldı. Sakinlərə söküntü işinə dair rəsmi sənədlərin təqdim olunmaması məsələsi də müəmmalı olaraq qalmaqda davam edir.

"Yaşadığımız bina qəsdən yararsız hala salınır" - Səbaildən ŞİKAYƏT