Varis Məcidovun qəhrəmanlığından bəhs edən filmin TƏQDİMATI OLDU - FOTO

20 Yanvar faciəsinin 35 -ci il dönümünə həsr edilən "Qəhrəmanlıq varislikdir" sənədli filminin təqdimat mərasimi keçirilib.

 

Sfera.az xəbər verir ki, Sovet illərində Rusiyada hüquq-mühafizə orqanlarında çalışmış, daha sonra bu ölkədəki Azərbaycan diasporunun üzvü olmuş mərhum polis polkovniki Varis Məcidovun həyatından və qəhrəmanlığından bəhs edilən filmin layihə rəhbəri Xuraman Osmanova, rejissoru Nicat Cəlilov, ssenari müəllifləri isə Vahid Orucov və Bariqəm Şirəliyevdir.

Təqdimatın əvvəlində Azərbaycan Respublikasınin dövlət himni səsləndirilib və vətən uğrunda canlarından keçmiş şəhidlərin ruhu bir dəqiqəlik sükutla yad edilib. Daha sonra vətənpərvərlik ruhunda musiqilər səsləndirilib.
 

Layihənin rəhbəri ideya müəllifi Xuraman Osmanova Bizim.Media-ya filmin ərsəyə gəlməsindən bəhs edib:


 

"Film 20 Yanvar 1990-cı ildə SSRİ rəhbərliyi tərəfindən günahsız yerə həbs edilib, Rusiyanın Ulyansk şəhəri həbsxanasına işgəncələr verilərək aparılan 46 nəfər azərbaycanlını böyük risk altında qəhrəmanlıq göstərərək həbsxanadan azad etdirmiş Varis Məcidovdan bəhs edir. Alimlər, gəmi kapitanları, televiziya işçiləri, dəmiryolçular və azadlıq hərərakıtının digər fəalları olmaqla, 46 nəfər məhbusun üzləşdiyi çətinliklər və onların xilas edilməsi filmdə ekranlaşdırılıb.

Varis Məcidovun 70 illiyi münasibətilə keçirilən bir tədbirə dəvət olunmuşdum. Onun haqqında kitab ərsəyə gətirilmişdi. Göstərdiyi qəhrəmanlıq nümunəsi məni çox təsirləndirdi. Düşündüm ki, bu qəhrəman mütləq şəkildə tanıdılmalıdır. Onun haqqında yüzlərlə kitab yazılsa da vizual olaraq təqdim edilməsi gənclər üçün daha faydalıdır. Bu səbəbdən də sənədli filmin çəkilişi üçün yola çıxdıq”.

X. Osmanova qeyd edib ki, gənclərdə milli vətənpərvərlik hisslərinin artırılması üçün belə addımların atılması mütləqdir.
 

Filmin rejissoru Nicat Cəlilov ekran işinin çəkiliş prosesindən danışıb:

"Azərbaycan var olduğu müddətdə qəhrəmanları olub. Bu gün təqdimatı baş tutan filmin baş qəhrəmanı Varis Məcidov da onlardan biridir. O, vətənə qayıtdıqdan sonra Birinci Qarabağ müharibəsində də iştirak edib.

Bu, həqiqətən təsirli və nümunəvi bir addımdır. Varis Məcidov Rusiyanın Ulyansk şəhərində polis işləyərkən 46 azərbaycanlının ora gətirildiyini bilir və digər 6 qardaşı ilə birgə əsl qəhrəmanlıq göstərirlər. Həmin şəxsləri Azərbaycana göndərirlər. Bu, əvəzedilməzdir. Qərara gəldik ki, bu, tanıdılmalı və ekranlaşdırılmalıdır”.

Rejissor bildirib ki, filmin çəkilişləri 2 ay davam edib, proses 3-4 ay çəkib. Çəkilişlər əsasən, Lənkəran, Göyçay və Bakıda baş tutub.

Varis Məcidovun həyat yoldaşı Nişanə Məcidova qəhrəmanın həyatı barədə ekranlaşdırılan əsərə görə qürur hissi keçirdiklərini bildirib:

"Çox şad oldum Varisin haqqında filmin çəkilməsinə. 35 il sonra da unudulmayıb hələ də yadda qalmasına sevindim. O, hər zaman bizim yaddaşımızdadır. Çox vətənpərvər insan idi. Yaxşı insan olub. Bunu sözlərlə ifadə edə bilmirəm. Övladları, nəvələri də onunla qürur duyurlar. Biz elə bilirik ki, o, həmişə bizimlədir".