"Son zamanlar efirdə yayımlanan bəzi ailə mövzulu verilişlər cəmiyyət üçün mənfi nəticələr doğurur. Bu proqramlar ailə institutunu zəiflətməklə yanaşı, vətəndaşların hüquqlarının da pozulmasına yol açır".

Sfera.az xəbər verir ki, bu sözləri Hüquq və İnsan Haqları İnstitutunun İnsan hüquqları üzrə təlim və ekspertiza şöbəsinin təlimçi eksperti Heydər Əliyev Konstitusiya və insan hüquqları mövzusunda keçirilən məlumat sessiyasında çıxışında qeyd edib.

Təlimçi-ekspert bildirib ki, o, iki uşaq atasıdır və övladlarının bu cür proqramlara baxmasını istəmir: "Konstitusiyamızda qeyd olunur ki, ailə dövlətin himayəsindədir. Amma efirlərdə ailə dramları ucuz əyləncə və reytinq vasitəsinə çevrilib. Vətəndaşlar cüzi məvacib qarşılığında şəxsi həyatlarını efirdə ifşa edirlər, bu isə çox ciddi problemdir”.

H.Əliyev hüquqi savadsızlığın cəmiyyət üçün təhlükəli nəticələr doğurduğunu qeyd edərək bəzi hüquqşünasların da məsuliyyətsiz çıxışlarını tənqid edib:

“Əgər hüquqşünas zərərçəkmişə "vaxtında ananın dediyi adama getsəydin, belə olmazdı" deyirsə, bu hüquqi yanaşma deyil, köhnəlmiş stereotipdir. Hüquqi baxımdan hər bir şəxs təhqir və böhtan qarşısında hüququnu tələb edə bilər. Amma hüququnu bilməyən insan özünü necə müdafiə etsin?”

Ekspert sonda çağırış edərək qeyd etdi ki, media hüquqi maarifləndirmədə daha fəal rol almalı, vətəndaşların hüquqi biliklərini artırmaq üçün geniş platformalar yaradılmalıdır.

O söylədi ki, //lhri.az/az/pass linkinə bütün vətəndaşlar şikayətlərini anonim və ya açıq şəkildə yazıb göndərə bilər.

Bəsti Rəfizadə

"Bəzi verilişlər ailə institutunu zəiflədir" - Ekspert