Aprelin 22-də Hüquq və İnsan Haqları İnstitutu və Azərbaycan Respublikasının Medianın İnkişafı Agentliyinin birgə təşkilatçılığı ilə “Konstitusiya və Suverenlik İli” çərçivəsində media nümayəndələri üçün məlumat sessiyası keçirilir.

“Konstitusiya ali hüquqi sənəd kimi: Əsas insan hüquq və azadlıqlarının Azərbaycan Respublikasının Konstitusiyasında təminatı” mövzusunda keçirilən tədbirdə 27 media nümayəndəsi iştirak edir.

Sfera.az xəbər verir ki, sessiyanın açılışında çıxış edən Hüquq və İnsan Haqları İnstitutunun İdarə Heyəti sədrinin müavini Vəfaddin İbayev institut ilə Medianın İnkişafı Agentliyi arasında mövcud olan əməkdaşlıqdan bəhs edib. O, insan hüquqlarının pozulması ilə bağlı mediada yayımlanan xəbərlərin monitorinq edildiyini və bu istiqamətdə iki hesabatın hazırlandığını qeyd edib. V.İbayevin sözlərinə görə, üçüncü monitorinq hesabatı üzərində işlər davam etdirilir və sentyabr ayında media üçün növbəti maarifləndirici təlimin keçirilməsi nəzərdə tutulur.

Medianın İnkişafı Agentliyinin İcraçı direktorunun müavini Natiq Məmmədli isə çıxışında konstitusiya prinsiplərinin və hüquq-azadlıqların cəmiyyətə düzgün çatdırılmasında medianın əsas rola malik olduğunu vurğulayıb. O, medianın demokratik dəyərlərin təbliğində obyektiv və etibarlı platforma kimi çıxış etməsinin vacibliyini diqqətə çatdırıb.

Tədbirin davamında İnstitutun təlimçi-ekspertləri Zümrüd Əlizadə və Heydər Həsən oğlu Əliyev tərəfindən insan hüquqlarına dair təqdimatlar təqdim olunub. Onlar konstitusion hüquqlar, beynəlxalq müdafiə mexanizmləri, mədəni və sosial hüquqlar, eləcə də ana dilindən istifadə və ekoloji hüquqlar mövzularında məlumat veriblər.

Bəsti Rəfizadə

Medianın insan hüquqları sahəsində rolu müzakirə olunub - FOTOLAR