Toy edən, nişan keçirən, doğum gününü qeyd edən şəxslərin çoxunu məclis keçirdiyi məkanın mətbəxi, yeməklərinin keyfiyyəti ilə yanaşı, pul ödənişi ilə bağlı qəbz ala bilməməsi də narahat edir.

Ən azı 200-250 nəfərin iştirak elədiyi toy məclislərinin keçirildiyi restoranların əksəriyyəti ödənişlə bağlı qəbz vermir.

Bu məsələ tez-tez sosial şəbəkələrdə gündəmə gəlsə də, dəyişiklik yoxdur. Halbuki "Nazirlər Kabinetinin "POS-terminallar quraşdırılacaq obyektlərin müəyyənləşdirilməsi meyarları"na əsasən şadlıq evləri də vergi ödəyicisi hesab olunur.

Bu günlərdə müğənni Nura Suri də sözügedən mövzuda status paylaşmışdı: “Heç kəs toy edib şadlıq sarayından çek almır. Niyə? Evinizdə çörək bişirib satsanız, vergi qapınızı kəsdirəcək ki, cərimə ödə, çörəyi satanda çek verməmisiniz. Necə olur ki, 50-500 min arası şadlıq sarayına toya pul ödənilir və heç kəs nə çek tələb edir, nə də çek verir?”

Cərimə gözləyir...

Sfera.az xəbər verir ki, mövzu ilə bağlı Bizim.Media-ya danışan tanınmış hüquqşünas Əkrəm Həsənov bildirib ki, xidmət göstərən, iş görən hər kəs qəbz verməlidir:

“İctimai iaişə xidməti göstərən hər bir obyekt çek verməyə borludur. Vermirsə, bu, vergidən yayınmadır. Şadlıq evləri ictimai iaşə obyekti sayılır. Buna görə digər ictimai iaşə obyektlərində olduğu kimi şadlıq evləri də vətəndaşlara çek verməlidir. Vergidən yayınmaya görə Dövlət Vergi Xidməti çek verməyənləri cərimə etməlidir, ödənilməyən vəsait ehtimal edilən məbləğə görə hesablanıb onlardan tutulmalıdır”.

Vəkil bildirib ki, vətəndaş da bu məsələdə tələbkar olmalıdır:

“Vətəndaş bununla bağlı çeki tələb etməlidir. Əgər verməzsə, o zaman vergi xidmətinə şikayət etməlidir. Bu barədə Vergi Məcəlləsində cəza nəzərdə tutulub. Birincisi, həmin obyekt məbləğ üzrə tam vergini ödəməlidir. Bu hal təkrarlanarsa, cinayət işi də açıla bilər”.

“Şadlıq evi çek vermirsə...”

Azad İstehlakçılar İctimai Birliyinin sədri Eyyub Hüseynov da şadlıq evlərində istehlakçı hüquqlarının bu şəkildə pozulmasının geniş yayıldığını bildirib:

"Biz hər dəfə toy eləmək üçün şadlıq sarayı seçən istehlakçılara deyirik ki, ilk olaraq onların mətbəxinə baxmağa cəhd edin. Görün təmizlik nə vəziyyətdədir? Əgər orda köhnə yemək qalıbsa, həmən üzünüzü çevirin, ordan gedin.

İkinci problem də çek məsələsidir. Çox zaman restoranın pulu gecə ödənilir, onlar da heç bir sənəd vermir. Bu, çox geniş yayılmış bir məsələdir. Düşünürəm ki, Vergi Xidməti bu məsələni həll etməlidir. Eləcə də, Nazirlər Kabineti bir müqavilə forması tərtib etməlidir və bir çox məsələlər orda əks olunmalıdır. Zəhərlənmələrin baş verməməsi üçün qalmış yeməklərin hara, kimə verilməsi orda əks olunmalıdır. Eləcə də çekin verilməsi məsələsi də burada nəzərə alınmalıdır”.

Mütəxəssis bildirib ki, istehlakçılar da bu məsələdə ayıq-sayıq olmalıdırlar: “Hansı şadlıq evi çek vermirsə, ishehlakçılar onların xidmətindən istifadə etməməlidir”.

Şadlıq saraylarına XƏBƏRDARLIQ – Çek verməkdən imtina etsələr...