"İslam pullu olanların Həccə gedib cənnəti alacağı din deyil" - Elşad Miri
2024-cü ildə rekord sayda Həcc və Ümrə zəvvarı qeydə alınıb. Həcc və Ümrə Nazirliyindən verilən məlumata görə, 2024-cü ildə ümumilikdə 18 535 689 zəvvar Məkkə şəhərində yerləşən Məscidül-Əqsada Həcc (1 611 310) və Ümrə (16 924 689) ziyarətlərini yerinə yetirib.
Həmçinin, 13 milyondan çox zəvvar Mədinə şəhərində əziz İslam peyğəmbəri hz.Məhəmmədin (s) mübarək məzarının yerləşdiyi Məscidün-Nəbini də ziyarət edib.
Bu il isə bir gündə - 7 martda tarixdə ilk dəfə olaraq 500 min insan eyni anda ümrə edib. Ölkəmizdə də ziyarət edənlərin sayı kifayət qədərdir.
Azərbaycanlı zəvvarlar üçün 2025-ci ildə Həcc ziyarətinin qiymətləri bir nəfərə görə ziyarət paketinin qiyməti 5 950 ABŞ dolları (10 115 manat) təşkil edir. Ötən il isə bu məbləğ 5750 ABŞ dolları (9 775 AZN) idi.
Maraqlıdır, ziyarətlərin artmasının səbəbləri nələrdir? Təbii ki, ziyarətçilər arasında ilk dəfə getməyənlər də var. Dəfələrlə gedən şəxslərin bu ziyarətdən gözləntisi nədir?
Mövzu ilə bağlı Sfera.az-a açıqlamasında dinşünas Elşad Miri bildirib ki, ziyarətə gedən insanlar günlərini otellərdə qalmaqla, Kəbə ətrafında təvaf etməklə, Quranda olmamasına baxmayaraq, şeytana daş atmaqla keçirirlər. Təbii olaraq kim hara istəsə, gedə bilər, amma bu səfəri din adı altında həyata keçirmək düzgün deyil.
Onun sözlərinə görə, bəşər tarixində hər il bu qədər insanın yığışdığı ikinci bir tədbir, festival və ya mərasim yoxdur:
“Bu yığışmağın insanlığa nə faydası var? Bu izdihamdan sonra nələr dəyişir? Təəssüflər olsun, demək olar ki, heç nə, çünki arxa planında düzgün məqsəd yoxdur. Sadəcə adlarının qarşısında “hacı” və ya “hacıxanım” kimi anlayışlar olur, bir rütbəyə yiyələnirlər. 1968-ci ildən bu yana 99 milyondan çox insan Məkkəyə səfər edib. 2.4 milyon insan isə Həcc səfəri edib. Qara daşı öpmək üçün başqalarına əziyyət vermək ibadətdirmi? Guya o daşa toxunan Allaha toxunmuş kimidir. Halbuki, həmin daş 930-cu ildə Qərməti lideri Əbu Tahir tərəfindən Kəbədən qaçırılıb. Hatimilər 30 min dinar verərək 22 ildən həmin qara daşı gətirib geri qoydular. Bəs həmin 22 il ərzində oraya gedən insanların ziyarətləri nə yerdə qaldı? 50 ildən çoxdur betondan düzəldilən yerə daş atırlar. Bəziləri etibarnamə verib öz yerlərinə başqasını göndərir. Bunun nə faydası var?”
E.Miri vurğulayıb ki, İslam dini pulu olanların Həccə getməklə sanki cənnəti satın ala biləcəyi din deyil.
Firuzə Əliyeva
