Bank kartlarından oğurluğun qarşısını necə alaq? - AÇIQLAMA

Son zamanlar gündəmdə olan məsələlərdən biri də bank kartlarından maliyyə vəsaitlərinin oğurlanmasıdır.

Hər gün artan bu problem insanların böyük məbləğdə vəsaitlərinin kibercinayətkarlıq yolu ilə ələ keçirilməsinə səbəb olur. Qeyd edək ki, son bir həftə ərzində bu cür hallarda ümumilikdə 300 min manat məbləğində pul oğurlanıb. Bu prosesin davam etməsi insanlarda kartla əməliyyatlara inamı zəiflədir. 

Maraqlıdır, ardıcıl şəkildə həyata keçirilən bu cinayətin qarşısını almaq nə üçün mümkün olmur? 

Sözügedən məsələ ilə bağlı Sfera.az-a açıqlama verən AİKTSA sədri Elvin Abbasov təəssüf ki, son vaxtlar Azərbaycanda baş verən kiberdələduzluq halları artmaqda davam etdiyini deyib. 

O qeyd edib ki, bu cinayətlər əsasən sosial mühəndislik üsullarına- yəni insan psixologiyasına təsir göstərərək məlumat əldə etməyə əsaslanır:

“Bu zaman kart sahibinin şəxsi məlumatları – CVV kodu, OTP şifrəsi və ya internet bankçılıq məlumatları telefon, sosial media və ya saxta saytlarda ələ keçirilir. Hücum edənlər texniki deyil, sosial zəifliklərdən istifadə edirlər”.

İT mütəxəssisi problemin kökündə həm vətəndaşların rəqəmsal savadlılığının az olması, həm də bəzi texnoloji boşluqların dayandığını vurğulayıb. 

E.Abbasov bildirib ki, banklar təhlükəsizlik sistemlərini gücləndirsə də, istifadəçilərin diqqətsizliyi və maarifləndirmənin hələ də zəif olması səbəbindən bu hallar davam edir:

“Unutmaq olmaz ki, təhlükəsizlik yalnız texnologiya ilə deyil, həm də insan davranışı ilə bağlı məsələdir. Kartla ödənişlərə inamın sarsılmaması üçün hər iki tərəf – həm vətəndaş, həm də maliyyə qurumları üzərinə düşəni etməlidir. Vətəndaşlar heç bir halda şəxsi məlumatlarını paylaşmamalı, banklar isə mütəmadi olaraq təlimatlar verməli, texniki infrastrukturunu yeniləməlidir. Eyni zamanda, bu cür halların qarşısının alınması üçün hüquq-mühafizə orqanları və bank sektorunun daha koordinasiyalı fəaliyyətinə ehtiyac var”.

Fidan Hacızadə