Bakıda leysan xarakterli yağışın yağmasından sonra paytaxtın bir çox küçə və prospektini su basıb. Yollar keçilməz hala düşüb, minik avtomobilləri və ictimai nəqliyyat vasitələri suyun içində qalıb. Xüsusilə Yasamal rayonu və şəhərin mərkəzi küçələrində yaranmış vəziyyət yollarda hərəkəti çətinləşdirib.

Sosial şəbəkələrdə paylaşılan video və foto görüntülərdən açıq şəkildə görünür ki, bəzi küçələr avtomobillər və piyadalar üçün keçilməz vəziyyətdədir. Sakinlər və sürücülər sosial şəbəkələrdəki paylaşımlarında illərlə təkrarlanan bu mənzərənin kökündə duran səbəblərin nəhayət araşdırılmasını və məsul şəxslərin cəzalandırılmasını tələb edirlər.

Mövzu ilə bağlı Sfera.az-a açıqlama verən nəqliyyat və infrastruktur üzrə ekspert Elməddin Muradlı söylədi ki, bu problemin kökü uzun illər əvvəl şəhər rəhbərliyi tərəfindən atılan yanlış qərarlarla bağlıdır:

“Zamanında bu problemlərin həlli üçün kifayət qədər vəsait ayrılıb, işlərin görülməsi üçün göstərişlər verilib. Amma bəzi məmurlar problemlərin əsaslı şəkildə həllinə imkan yaratmayıb, ardıcıl səhvlərə yol verilib. Bu cür davranışla mövcud qanunvericilik pozulub. Bizim mövcud qanunvericiliyə görə, yağış suları kanalizasiya xətlərinə axmamalıdır. Qanun bunu açıq şəkildə deyir. Amma indi hər yerdə yağış suları kanalizasiyaya axıdılır və kanalizasiya xətləri də buna tab gətirmir. Nəticədə daşır və aydın məsələdir ki, vəziyyət pisləşir”.

Ekspert keçmiş Bakı Şəhər İcra Hakimiyyəti rəhbərliyini bu sahədəki sistemli problemlərə görə məsuliyyətli hesab edir:

“Bunu kim edib? Vaxtilə Bakı Şəhər İcra Hakimiyyətinin başçısı olmuş Hacıbala Abutalıbov. O adam bilinmir ki, şəhərin düşməni idi, ya da nə məqsədi var idi. O, Bakıya çox böyük ziyan vurdu. Mən Yasamalda şahidi olmuşam ki, təmir işləri zamanı həmin yağış barmaqlıqları yox edilib.
Həmin dövrdə yağış barmaqlıqları məqsədli şəkildə sökülüb, bəziləri isə hətta satılıb. Bakı Şəhər İcra Hakimiyyətinin balansında olan yollarda demək olar ki, hamısında yağış barmaqlıqlarını sökdürüb satdırırdılar. Bu işlərin başında da Azad Balabəy Taliboğlu dururdu. Amma təəssüf ki, onun fəaliyyətinə qiymət verilmədi, araşdırılma aparılmadı, o, məsuliyyətə cəlb olunmadı”.

Ekspertin fikrincə, əsas problemlərdən biri də şəhərin əhali sayında qeyri-rəsmi artımın nəzərə alınmamasıdır:

“Bakı şəhərinin kanalizasiya sistemi 2-3 milyon nəfərlik əhali üçün nəzərdə tutulub. Halbuki, qeyri-rəsmi rəqəmlərə görə, Bakıda 5 milyondan çox adam yaşayır. Bu qədər əhaliyə bu sistem necə dözsün?”

E.Muradlı hesab edir ki, Bakıda yeni yaşayış binalarının tikilməsi zamanı da kanalizasiya xətlərindəki yüklənmə nəzərə alınmayıb:

"Hər yeni bina tikiləndə əlavə kanalizasiya yükü sistemə ötürülür, lakin bu dəyişikliklərə uyğun yeni infrastruktur yaradılmır. Bəzi tikinti şirkətləri var ki, özlərinə hörmət edirlər. Onlar iş görəndə kanalizasiya xətlərinin yenilənməsini də nəzərə alırlar, layihə verirlər, dövlətə pul ödəyirlər. Amma bəzi məmur-oliqarx şirkətlər məsuliyyətdən qaçır, nəticədə belə fəlakətli mənzərə yaranır”.

Bəs şəhərdə yaranmış vəziyyətlə bağlı rəsmi qurumlar hansı fikirdədir?

Problemlərlə bağlı ADSEA – İri Şəhərlərin Birləşmiş Su Təchizatı Xidməti də açıqlama aldıq. ADSEA-dan saytımıza verilən açıqlamada bildirilib ki, hazırda bütün qəza briqadaları ərazilərə cəlb olunub, nasaz kollektorlar və nasos stansiyaları təftiş olunur:

“İntensiv yağıntılar zamanı müxtəlif ərazilərdə yaranan problemlərin aradan qaldırılması məqsədilə ADSEA gücləndirilmiş iş rejimində fəaliyyət göstərir. Kanalizasiya kollektorlarının yuyulması, baxış quyuları və yağış barmaqlıqlarının təmizlənməsi işləri müntəzəm həyata keçirilir”.

Bəsti Rəfizadə

Bakını yenə su basdı: "Yağış barmaqlıqları yığılmasaydı belə olmazdı"