Keçən həftə Nizami rayonu, Heydər Əliyev prospekti ilə Ələsgər Qayıbov küçəsinin kəsişməsində yol-nəqliyyat hadisəsi baş verib.

Xəbər verdiyimiz kimi, "Bolt" şirkətinin taksisi kənar yoldakı beton maneəni dağıdaraq prospektin əsas hissəsinə düşüb. Qəzadan sonra sosial şəbəkələrdə sürücü, 1974-cü il təvəllüdlü Anar Nəcəfovla bağlı müxtəlif iddialar irəli sürülüb.

Taksi qəzasında xəsarət almış sərnişin bildirib ki, Bolt-dan sifariş verdikdə proqramda olan sürücü yox, başqası gəlib. Məlum olur ki, həmin şəxs başqasının adına qeydiyyatdan keçərək qanunsuz taksi fəaliyyəti ilə məşğul olub. Həmin sürücü haqqında həbs qərarı verilib. Eyni zamanda şəxsin epilepsiya xəstəliyi olduğu deyilib.

Bəzi şəxslər sistemdə qeydiyyatdan keçə bilmədiyindən başqalarının məlumatlarından istifadə edirlər. Belə halların qarşısının alınması üçün nə etmək lazımdır?

Mövzu ilə bağlı Sfera.az-a açıqlama verən nəqliyyat eksperti Aslan Əsədov bu cür halların qarşısını almağın çətin olduğunu və bu vəziyyətin ümumi iş prinsipinə uyğun gəlmədiyini deyib.

Ekspertin sözlərinə görə, belə vəziyyətin yaranması vətəndaşlarda narazılıq yaradan əsas amillərdəndir: “Buna görə də aidiyyəti qurumların nəzarətinin daha güclü olması vacibdir. Dövlət qurumları bu sahədə daha ciddi təsir və nəzarət mexanizmlərinə malik olmalıdır ki, gələcəkdə oxşar problemlərin baş verməsinin qarşısı alınsın. Digər nümunələr isə arxa planda qalır. Hazırda məsələni qeydiyyata alan və prosesə nəzarət edən qurum eyni zamanda bu vəziyyətə görə cavabdehlik daşıyır. Məsuliyyət birbaşa həmin qurumun əməkdaşlarının üzərinə düşür”.

A.Əsədov istər epilepsiya xəstəsi, istərsə də hər hansı asılılıq problemi olan şəxslər müəyyən hallarda işdən uzaqlaşdırılmalı olduğunu vurğulayaraq bildirib ki, əks təqdirdə, bu, cəmiyyət üçün ciddi təhlükələr yarada bilər.

Fidan Hacızadə

Bu şəxslər işdən azad edilə bilər - AÇIQLAMA