Aprelin 10-dan 13-dək paytaxt Bakının Dənizkənarı Milli Park ərazisində Qətər Mədəniyyəti Günləri keçirilir. Mədəniyyət Nazirliyinin təşkilatçılığı və Qətərin Azərbaycandakı səfirliyinin dəstəyi ilə baş tutan bu tədbir iki ölkə arasında mədəni körpülərin möhkəmlənməsinə xidmət edir.

Sfera.az xəbər verir ki, festival çərçivəsində Qətərin zəngin tarixi, bədii irsi və mədəni ənənələri Bakı sakinlərinə və şəhərimizin qonaqlarına təqdim olunur.
Tədbir ərazisində Qətər mədəniyyətinə xas müxtəlif təyinatlı pavilyonlar qurulub. Əsas diqqət çəkən nüanslardan biri də Qətərdən gətirilmiş şahin quşunun insanlar qarşısında təqdim edilməsi idi. Eyni zamanda toxuculuq, xına, kalliqrafiya sənəti və biştin adlı qətər modası, taxta qutuların hazırlanması və mirvari dalğıcla yaxından tanış olurlar.

Təqdimat keçirilən əraziyə yaxınlaşdıqda ziyarətçiləri Qətər mədəniyyətinə məxsus sakit və melodik musiqi səsləri qarşılayır. Ərazidə quraşdırılmış dinamik sistemlər vasitəsilə səsləndirilən bu musiqilər tədbirə xüsusi ab-hava qatır.

Eyni zamanda Qətərdən ölkəmizə gəlmiş nümayəndələr müxtəlif milli ağ geyimləri ilə diqqət mərkəzindədir. Onların yerli sakinlərlə ünsiyyəti, pavilyonlarda göstərdikləri interaktiv təqdimatlar tədbirin canlı və dinamik keçməsinə səbəb olur. Qeyd edək ki, aprelin 10-da Qətər Mədəniyyəti Günlərinin rəsmi açılış mərasimi Heydər Əliyev Mərkəzində baş tutub.

Qonaqlar arasında Azərbaycan Respublikasının mədəniyyət naziri Adil Kərimli də yer alıb. Nazir tədbir çərçivəsində qurulan pavilyonları ziyarət edərək Qətər mədəniyyətini əks etdirən eksponatlarla yaxından tanış olub.

İnsanların Qətər mətbəxinə məxsus çay və müxtəlif təamlardan dadma imkanı var.

Qətər mədəniyyətinə aid “biştin” sənətini təqdim edən qonaq bildirib ki, hazırda Azərbaycanda keçirilən Qətər Mədəniyyət Həftəsində iştirak edirlər. Onun sözlərinə görə, ənənəvi geyimlər pavilyonunda qadın geyimlərinin müxtəlif növləri – “nişl”, “kərrar”, “nəffəhhah” və “nəqdə” nümayiş olunur. Qonaq qeyd edib ki, xüsusilə “nəqdə” sənəti öz zərif naxışları ilə seçilir. Bu sənətdəki bəzəklər xüsusi ip vasitəsilə ziyarətçilərə nümayiş etdirilir və onların mənası ətraflı şəkildə izah olunur.

Qətərin paytaxtı Dohadan Azərbaycana gəlmiş Əli Əl-Həddad bildirib ki, o, miras mövzusunda hazırlanmış əl işi taxta qutularla Qətər Mədəniyyəti Günlərində iştirak edir.

"Qətərin Doha şəhərindən gəlmişəm. Azərbaycana həm burada keçirilən tədbirdə iştirak etmək, həm də yerli xalqı yaxından tanımaq üçün gəlmişəm. Mənim hazırladığım sandıqlar əsasən evlilik mövzusuna həsr olunub və əl işləridir. Bəziləri Qətərdə əllə hazırlanaraq xüsusi olaraq bura gətirilib”, – qonaq vurğulayıb.

Xatırladaq ki, Qətər Mədəniyyəti Günləri Azərbaycanda sonuncu dəfə 2009-cu ilin iyun ayında keçirilmişdi. Həmin tədbir də ölkəmizdə böyük maraqla qarşılanmışdı. Bundan əlavə, 2024-cü ilin fevralında Qətərin paytaxtı Dohada təşkil olunan Azərbaycan Mədəniyyəti Günləri dost ölkədə mədəniyyətimizin təntənəli təqdimatı ilə yadda qalıb və iki ölkə arasında mədəni əməkdaşlığın gücləndirilməsi baxımından əlamətdar hadisə olub.

Müxbir: Fidan Hacızadə

Fotolar: Anar Bayramlı

Dohadan Bakıya mədəniyyət səfəri: "Qətər günləri"ndən REPORTAJ