Küləkli yaz Bakı sakinlərini yenə sınağa çəkdi - FOTOLAR

Son günlərdə paytaxt Bakıda müşahidə olunan güclü külək şəhər həyatını hiss olunan dərəcədə təsirləndirib. Bir neçə gün müşahidə edilən isti havalardan sonra Bakıda soyuq və küləkli hava hakim kəsilib. Havaların küləkli və soyuq keçməsi şəhər sakinlərinin yenidən qış paltarlarını geyinməsinə, şəhər gəzintilərini təxirə salmağa məcbur edib. Xüsusilə dənizkənarı bulvar və açıq meydanlarda külək həyat ritmini bir qədər yavaşladıb. 

Sfera.az saytının fotoqrafı Bakının küləkli günündə şəhər həyatını əks etdirən mənzərələri çəkib.

Fotolardan görünür ki, sakinlər küləyə qarşı mübarizə aparır, bir çoxları isə bu təbii hadisəni gündəlik həyatın ayrılmaz bir hissəsi kimi qəbul edir.

Külək əsasən səhər və axşam saatlarında güclənir. Bu isə küçədə olan insanların geyimindən tutmuş, hərəkət tərzinə qədər hər şeyə təsir edir. Qadınların saçları küləkdə dağılır, kişilər papaqlarını tutmağa çalışır, valideynlər isə uşaqları küləkdən qoruyur. Şəhərin bəzi hissələrində küləyin gücü elə artır ki, çətir açmaq mümkünsüz hala gəlir.

Meteoroloqlar bildiriblər ki, bu, Bakı üçün adi haldır və yaz aylarında küləkli hava tez-tez müşahidə olunacaq. Azərbaycan Milli Hidrometeorologiya Xidmətinin verdiyi məlumata görə, aprel və may aylarında mülayim temperaturla yanaşı, şimal-qərb və ya şimal-şərq küləklərinin artması gözlənilir. Bu isə, şəhərdə gündəlik həyatın müəyyən qədər çətinləşməsinə səbəb ola bilər.

Bəsti Rəfizadə