Erkən nikahla bağlı qanunda dəyişikliklər EDİLDİ - DETALLAR

Cəmiyyətimizi  narahat edən məsələlərindən biri də məhz erkən evliliklərdir. Azyaşlı uşaqları erkən evliliyə məcbur etmək heç bir halda normal qəbul edilmir. Belə halların qarşısının alınması istiqamətində dövlət tərəfindən mütəmadi olaraq tədbirlər görülür, qanunvericilikdə dəyişiklliklər edilir. Amma yenə müxtəlif bölgələrimizdə erkən nikahla bağlı hallara rast gəlinir.
 

Sfera.az xəbər verir ki, son zamanlar erkən nikahın qarşısını almaq üçün görülən tədbirlər barədə Bizim.Media-nın sorğusuna Ailə, Qadın və Uşaq Problemləri üzrə Dövlət Komitəsindən bildirilib ki, əvvəlki illərlə müqayisədə 18 yaşadək olan analar tərəfindən doğulan uşaqların sayında  azalma müşahidə olunur.

“Komitə tərəfindən, eləcə də komitənin nəzdində fəaliyyət göstərən Ağdam, Zərdab, Goranboy, Göygöl, İsmayıllı, Zaqatala, Saatlı, Sabirabad, Qəbələ, Hacıqabul, Şüvəlan Uşaq və Ailələrə Dəstək Mərkəzləri tərəfindən  yeniyetmə və gənclərin erkən evlilik, eləcə də qohum evliliklərinin mənfi nəticələrinə dair məlumatlılıq səviyyəsinin artırılmasına xüsusi önəm verilir:

“Dövlət Komitəsi uşaq evliliyi ilə bağlı məlumat daxil olan kimi komitənin nəzdində fəaliyyət göstərən Uşaq və Ailələrə Dəstək Mərkəzlərinin, yerli icra hakimiyyətlərinin və polisin nümayəndəsinin iştirakı ilə  ailələrə səfərlər təşkil edilir. Bu cür nikahlara görə qanunvericilikdə nəzərdə tutulan məsuliyyət izah olunur. Belə hallarla üzləşən şəxslər üçün, ümumiyyətlə  gender əsaslı zorakılıqla üzləşən şəxslər üçün Dövlət Komitəsi yanında 860 qaynar xətt (860), Dövlət Komitəsinin dəstəyi ilə Uşaq hüquqlarının müdafiəsi üçün 116111 qaynar xətti yaradılıb”.

Komitədən o da qeyd olunub ki, 2024-cü ildə erkən evlilik və qohum evliliklərinin qarşısının alınması istiqamətində Ailə Məcəlləsinə, Cinayət Məcəlləsinə, İnzibati Xətalar Məcəlləsinə dəyişikliklər edilib. Qanunda edilən dəyişikliklər 2025-ci ilin iyulun 1-dən qüvvəyə minir.
 

Dövlət tərəfindən görülmüş bütün bu işlərin nəticəsi kimi ölkə üzrə 2023-cü ildə 18 yaşadək analar tərəfindən doğulan uşaqların sayı 2022-ci illə müqayisədə 15% azalıb.