Ailələr evlilik və toylarla bağlı böyük məbləğdə vəsait xərcləyir. Hər 3 evlənəndən biri isə sonradan ailədaxili problemlər səbəbindən, maddi çətinlik nəticəsi ilə və ya tərəflərdən biri ailə dəyərlərinə zidd addım atdığı hallarda boşanmalar qeydə alınır. Nəticədə hər iki tərəfə böyük məbləğdə maddi zərər dəyir.

Bununla bağlı Sfera.az-a açıqlama verən sosioloq Lalə Mehralı evlənmədən öncə, nişanlananda, toya hazırlaşanda bu planların uzun-uzadı ölçülüb-biçilməli olduğunu bildirib.

Sosioloqun sözlərinə görə, evləndikdən sonra borc batağında üzməmək, daha rahat həyat keçirmək, ömür-gün yoldaşı ilə düşüncələrin üst-üstə düşməsi kimi vacib detallar öncədən düşünülməlidir:

“Birlikdə yaşamaq, həyatı paylaşmaq və toya hazırlıq gənclərin ən şirin həyacanıdır, bu dövrü mal-mülk, bahalı restoran, daha bahalı zinət əşyaları, daha bahalı ev aşyaları haqqında dava-dalaşla keçirən tərəflərin ömür yolu da uzun olmur. Sağlam ünsiyyət və müzakirə mədəniyyəti ən vacib xırdalıqdır bu anlarda. Əgər tərəflər bu ünsiyyəti qura bilmirlərsə, müzakirə mədəniyyətləri yoxdursa və dünya malı üçün bir-birindən incik düşürsə bu evlilik başlamadan bitsə daha məqbuldur”.

L.Mehralı bəzi gənclərin evliliklərinin səbəbinin bahalı mal-mülk olduğunu vurğulayıb.

Onun sözlərinə görə, ailə büdcəsini evlilikdən öncə formalaşdıran, bütün proses boyunca ağıllı pul xərcləyən, gərəksiz xırdalıqlara fikir verməyən, bir-birinin fikrinə hörmət edən, bahalı və lazımsız prosedurlardan imtina edən gənclərin ailə həyatı da anlayışlı keçir:

“Bahalı toy, alınan borclar, xərclər evlilik ərəfəsində tərəflərin beynini o qədər məşğul edir ki fərqində olmadan depressiv vəziyyətə düşürlər, stresslə yol yoldaşı olurlar. Əgər tərəflər maddi cəhətdən yaxşı vəziyyətdədirlərsə, adətən xərclərin miqdarı ilə bağlı gərginlik olmur. Lakin bu halda da mübahisə ediləsi nəsə tapmaq olur. Bir tərəf evin qiymətinin yüksəkliyindən, digər tərəf isə bahalı cehizin vacibliyindən bəhs edir. Ümumi mənzərəni gördükdə insan, bu gənclərin bir-biri ilə evlənmə səbəblərinin bahalı ev və bir sərvət dəyərində cehiz olduğu qənaətinə gəlir”.

Fidan Hacızadə

"Bu cütlüklərin ömür yolu uzun olmur"- Sosioloqdan ETİRAZ