Son illərdə dünya üzrə nikah və boşanma statistikalarında ciddi dəyişikliklər müşahidə olunur.

Sfera.az xəbər verir ki, bir çox ölkədə evliliyin populyarlığı azalarkən, bəzilərində isə boşanma halları rekord səviyyəyə çatıb. Statistikalar göstərir ki, dünyanın ən çox nikah bağlanan ölkəsi Hindistandır. Burada hər il təxminən 10 milyon insan ailə həyatı qurur. Çin də bu sahədə liderlik edir. İllik 8-10 milyon nikah qeydiyyata alınır. ABŞ-də isə hər il təxminən 2 milyon nikah rəsmi qeydə alınır.

Lakin son illərdə Avropa və Asiyada nikah sayında azalma müşahidə edilir. Cənubi Koreya və Yaponiyada gənclər evliliyə əvvəlki qədər maraq göstərmir, bu da nikah sayının kəskin şəkildə azalmasına səbəb olur.

Dünyada boşanma nisbətinə görə isə ən yüksək olan ölkələr arasında Maldiv adaları var. Burada bir qadın ömrü boyu orta hesabla 3 dəfə boşanır. Rusiya (65%), Belçika (60%), Portuqaliya və Macarıstan (50%+) kimi ölkələrdə də boşanma halları yüksəkdir.

Əksinə, bəzi ölkələrdə boşanma göstəriciləri çox aşağıdır. Hindistanda bu rəqəm 1% civarındadır. Burada boşanma hallarının az olmasının əsas səbəbi sosial və ailə dəyərlərinin güclü olmasıdır.

Dünya üzrə boşanmalara təsir edən əsas səbəblər maddi çətinliklər və iqtisadi qeyri-sabitlik, xəyanət və etimadsızlıq, uyğunsuzluq və emosional problemlər, gənc yaşda evliliyin uğursuz nəticələridir.

Mütəxəssislər bildirirlər ki, gələcəkdə nikah və boşanma meylləri daha da dəyişə bilər. Xüsusilə gənc nəsil arasında evliliyə marağın azalması, qeyri-rəsmi birlikdə yaşama tendensiyalarının artması bu sahədə yeni dövrün başlanğıcına işarə edir.

Fidan Hacızadə

Ən çox nikah və boşanma bu ölkələrdədir - ADLAR