"Azərbaycanda məscidi də, kilsəni də, sinaqoqu da dövlət tikir" - Ceyhun Məmmədov

“Təkcə Ermənistan ərazisində 400-ə yaxın məscid, 500 qəbiristanlıq dağıdılıb. Eyni zamanda Qarabağda 67 məscid məhv edilib.  Hətta yeganə pravoslav kilsəsi belə dağıdılıb".

Sfera.az xəbər verir ki, bunu Milli Məclisin bu gün keçirilən plenar iclasında deputat Ceyhun Məmmədov deyib.

Millət vəkili qeyd edib ki, bu gün Azərbaycanı Qarabağda yaşayan ermənilərin hüquqlarını pozmaqda ittiham edənlər 30 il ərzində ölkədə məscidlərin dağıdılmasına, içərisində donuz və inək saxlanılmasına hər zaman göz yumublar və indi də eyni siyasət davam edir. 

Onun sözlərinə görə, Azərbaycan azsaylı ölkələrdəndir ki, burada məscidi də, kilsəni də, sinaqoqu da dövlət tikir:

“Azərbaycan müsəlman ölkəsi olsa da, heç zaman məscidi kilsə və sinaqoqdan ayırmayıb. Onlara hər zaman bərabər münasibət sərgiləyib. Bu reallığı artıq bütün dünya qəbul edib. Yaxşı olar ki, komissiya və departamentlər gözlərini açıb həqiqəti görsünlər. Azərbaycana qarşı bu cür kampaniya və təxribatlara son qoymağın vaxtı çoxdan çatıb. Onlar onsuz da heç zaman çirkin məqsədlərinə nail ola bilməyəcəklər. Bunun üçün sadəcə gözlərini açıb həqiqəti görməlidirlər. Həqiqət isə birdir”,-millət vəkili bildirib.

Firuzə Əliyeva