Uşağın beyninin inkişafında ilk illər həlledici əhəmiyyət daşıyır.

Sfera.az xəbər verir ki, bunu təhsil eksperti Kamran Əsədov deyib.

Onun sözlərinə görə, beyin inkişafının 90 faizi 5 yaşa qədər tamamlanır:

"Bu dövr uşağın öyrənmə qabiliyyətinin, sosial və emosional bacarıqlarının formalaşdığı ən vacib mərhələdir. Buna görə də məktəbəqədər təhsil sadəcə uşaq baxımı deyil, gələcəyin təməlidir.

Uzun illər ölkəmizdə uşaq bağçaları əsasən sosial qayğı mərkəzi kimi fəaliyyət göstərib. Təəssüf ki, bu yanaşma təhsil komponentini kölgədə qoyub. Lakin artıq Elm və Təhsil Nazirliyi bu sahəyə yeni nəfəs gətirir. Nazir Emin Əmrullayevin də vurğuladığı kimi, məktəbəqədər təhsil müəssisələrində çalışanlar diaqnostika və sertifikasiyaya cəlb olunacaq, bu sahədə yalnız uşağın psixologiyasını anlayan və onu inkişaf etdirə biləcək peşəkar kadrlar çalışacaq".

O qeyd edib ki, hazırda dövlət bağçalarında bir uşağın illik təhsili təxminən 4200 manata başa gəlir:

"Bu, mövcud sistemin davamlı və genişlənə bilən olmadığını göstərir. Yeni alternativ model üzrə seçilmiş özəl bağçalara dövlət tərəfindən aylıq 250 AZN dəstək verilir, qalan məbləği isə valideyn ödəyir. Bu yanaşma daha çox uşağın məktəbəqədər təhsilə cəlb olunmasına, eyni zamanda valideynlər üçün – xüsusən də işləyən analar üçün – bağçaların əlçatan olmasına şərait yaradır.

Beynəlxalq təcrübəyə nəzər salsaq, Finlandiyada 6 yaşlı uşaqların 99 faizi məktəbəqədər təhsilə cəlb olunur və bu mərhələdə yalnız magistr təhsilli pedaqoqlar çalışır. Estoniyada 3 yaşdan etibarən uşaqların 91 faizi bağçalara gedir və bu ölkə PISA nəticələrində Avropada lider mövqedədir. Sinqapurda məktəbəqədər təhsilə cəlbetmə səviyyəsi 95 faiz təşkil edir, aztəminatlı ailələr üçün aylıq ödəniş bəzən cəmi 1 ABŞ dolları qədər olur.

UNESCO-nun məlumatına görə, dünyada 5 yaşlı uşaqların təxminən 25 faizi heç bir məktəbəqədər təhsil almadan böyüyür. OECD ölkələrində isə 3-5 yaş arası uşaqların 90 faizi bu təhsil pilləsində iştirak edir. Bu mərhələdə təhsil almış uşaqların 15 yaşda PISA testlərində orta hesabla 20 bal daha yüksək nəticə göstərdiyi sübut olunub".

K.Əsədov onu da vurğulayıb ki, məktəbəqədər təhsil təkcə fərdi inkişaf üçün deyil, bütövlükdə cəmiyyətin gələcəyi üçün strateji əhəmiyyət daşıyır.

Firuzə Əliyeva

"Dövlət bağçalarında bir uşağa 4200 manat xərclənir" - Kamran Əsədov