"Hazırda öz evimizdəyik, gedəsi yerimiz yoxdur. Buna görə də çıxmamışıq".

Bunu Musavat.com-a açıqlamasında Yasamal rayonu, Alatava qəsəbəsində tikinti işi aparan şirkətin qanunsuz dağıtdığı evin sahibəsi Elarə Hacıyeva deyib.

O bildirib ki, evinin birinci və ikinci mərtəbəsinin aynabəndləri uçurulub: "Ətrafdakı bütün evlər sökülüb. Əvvəlcədən bizə heç bir xəbərdarlıq edilməyib və danışıqlara gedilməyib. Adətən vətəndaş şirkəti məhkəməyə verir. Bizdə isə əksinədir, onlar bizi məhkəməyə şikayət etmişdi. Qərarda isə göstərilirdi ki, 10 gün müddətində evi boşaldaq, evin çıxarışı ləğv edilir. Məktubun üstündə ev sahibi oğlum, içində isə Məlahət Hacıyeva adlı tanımadığımız şəxs göstərilmişdi. Məktubda bizə 175 min manat kompensasiya təklif edilirdi. Həmin təklifi rədd etdiyimiz üçün bizə xəbərdarlıq məktubu göndərmişdilər. Deyirdilər ki, 10 gün müddətində çıxmalıyıq, əks halda mülkiyyət hüququmuz ləğv ediləcək.

Oğlum həmin gün məktubu təkzib edərək geri göndərdi.

Şirkətin 3 nəfər nümayəndəsi bizim yanımıza gəldi. Onlardan biri Tural Vəliyev idi.O, özünü alqı- satqı rəhbəri kimi təqdim etdi. Digər ikisi isə mühəndis idi. Onlar evin ərazisini ölçdülər. Mənzilin kvadratının böyük olduğunu görəndə " Biz bu cür böyük gözləmirdik"- deyib getdilər. Bizim şirkət nümayəndələri ilə danışıqlarımız bundan ibarət oldu. Xəbərdarlıq məktubu onlar bizdən gedəndən 2 gün sonra gəldi və bildirildi ki, martın 13 - ü Yasamal rayonunda keçiriləcək məhkəməyə getməliyik".

E. Hacıyeva deyir ki, çırşənbə günündən bu yana hər gün vətəndaşın evinə hücum olurmuş:" Bizim birinci mərtəbə ilə əlaqəmiz tamami ilə kəsilmişdi.Zirzəmidən istifadə edə bilmirdik. Evin yanyörəsini uçurmuşdular. Biz polisə müraciət etdik. Bundan sonra şirkətin işçiləri aqressivləşib daha pis şəkildə hücuma keçdilər. Bu gün evimizin aynabəndlərini uçuranda mən, bacım və oğlum yaralandıq. Oğlumun ayağının altını şüşə doğrayıb. Bütün bu hadisələr "Melissa Park" şirkətinin işçilərinin gözü qarşısında baş verirdi, onlar bizə baxıb gülürdülər".

E. Hacıyeva deyir ki, hücumlar planlı şəkildə edilib: "Dünən axşam saat 7 - nin yarısında saqqalı və maskalı şəxs traktoru evin sol tərəfində saxladı. Mən başa düşdüm ki, onların planı var. Gecə 4- ə kimi yatmadıq, nəvəmi evdən çıxardıq. Saat 4- də işığı kəsdilər, eyni zamanda kanalizasiya sistemini dağıtdılar. Martın 24- də isə su xəttimizi kəsmişdilər".

Evi qanunsuz olaraq dağıdılan sakin DANIŞDI - ŞOK TƏFƏRRÜAT