ABŞ İrana qarşı hərbi əməliyyata başlaya bilər

ABŞ müəyyən şərtlər daxilində İrana qarşı hərbi əməliyyatlara əl ata bilər.

Sfera.az xəbər verir ki, bunu ABŞ prezidentinin xüsusi nümayəndəsi Stiven Vitkoff deyib.

"Bizim bütün məsələləri hərbi yolla həll etməyə ehtiyacımız yoxdur, lakin bu o demək deyil ki, əgər biz müəyyən bir həddə gətirilsək, hərbi əməliyyatlara əl atmayacağıq, müəyyən şərtlər altında bunu edəcəyik",-o bildirib.

Vitkoff əlavə edib ki, ABŞ Prezidenti Donald Trampın mövqeyi budur ki, İranın bombası (nüvə) olmamalıdır:

"Biz onlara nüvə arsenalının yaradılmasına başlamağa icazə verə bilmərik. Bu baş verməməlidir".

Martın 7-də Tramp özünün “Truth Social” səhifəsində yazıb ki, o, İranın ali dini lideri Ayətullah Əli Xameneiyə Tehranın nüvə proqramı ilə bağlı danışıqları təklif edən mesaj göndərib. İran lideri ABŞ prezidentinin bəyanatını şərh edərkən vurğulayıb ki, ölkəsi ABŞ ilə dialoqa getməyəcək, çünki Vaşinqton yalnız öz maraqlarını düşünür. Martın 12-də Xamenei Trampın danışıqlara hazır olması ilə bağlı sözlərini "dünya ictimai rəyinin aldadılması" adlandırıb.

Firuzə Əliyeva