Ailə həyatı qurduqdan sonra tərəflərin bir-birinə qarşı sevgi hissəsinin “öldüyünə” dair fikirlərə tez-tez rast gəlinir. Bu fikirlərin həqiqi olub-olmaması illərdir müzakirə olunur və fərqli yanaşmalar mövcuddur.

Bəs psixoloji baxımdan bu iddianın əsası varmı? Həqiqətənmi evlilik sevgini zəiflədir?

Psixoloq Aydan Məmmədova Sfera.az-a açıqlamasında bildirib ki, evlilik sevgini zəiflətmir, sadəcə münasibətlərin dinamikasını dəyişir.

“Evlilikdən sonra ilkin ehtirasın və romantizmin azalması normal prosesdir”, - deyən A.Məmmədova qeyd etdi ki, bunun səbəbi münasibətlərin yeni bir mərhələyə keçməsi, həyatın təzyiqləri və gündəlik qayğılarla bağlıdır:

“Sevgi yox olmur, sadəcə onun ifadə forması dəyişir. Evlilikdə sevgi daha stabil və dərin bir formaya keçir. Evliliyin ilk mərhələsində hər şey yenidir, insanlar bir-birini kəşf edir və bu, münasibətə xüsusi həyəcan qatır. Lakin zaman keçdikcə bu həyəcan azalır və sevgi daha çox qarşılıqlı anlayış, emosional dəstək və güvən üzərində qurulur”.

Onun sözlərinə görə, münasibətlərin monotonlaşması və gündəlik qayğıların çoxalması insanlarda sevginin itməsi kimi bir hiss yarada bilər:

“Əslində, bu, sevginin itməsindən çox, ona yetərincə diqqət ayrılmaması ilə bağlıdır. Münasibətlərə qayğı göstərilmədikdə, cütlüklər arasında emosional məsafə yarana bilər. Amma bunun qarşısını almaq mümkündür”.

A.Məmmədova bildirib ki, evlilikdə sevgini qorumaqda əsas çətinliklər monotonluq, stress, kommunikasiya çatışmazlığı və emosional ehtiyacların ödənilməməsidir:

“Evlilik illər keçdikcə vərdişə çevrilə bilər. Bu zaman tərəflər bir-birinə sevgi göstərmək üçün əvvəlki qədər səy göstərmir. Halbuki münasibətləri canlı saxlamaq üçün həm qadın, həm də kişi eyni dərəcədə çalışmalıdır. Xüsusilə açıq və səmimi ünsiyyət çox vacibdir”.

Psixoloq vurğulayıb ki, sevginin qorunması üçün tərəflər bir-birinə vaxt ayırmalı, yeniliklər etməli və birgə keyfiyyətli zaman keçirməyə çalışmalıdırlar:

“Kiçik jestlər belə münasibətə müsbət təsir edə bilər. Məsələn, bir-birinizə xoş sözlər demək, sürprizlər etmək və birgə maraqlı fəaliyyətlərə qatılmaq evliliyi monotonluqdan xilas edə bilər”.

A.Məmmədova qeyd edib ki, evlilikdə ehtirasın azalmasının əsas səbəbi beyində baş verən nevroloji dəyişmələrdir:

"Başlanğıcda münasibət yeni olduğu üçün beyin bu yeniliyə daha çox maraq göstərir və yüksək dopamin ifraz olunur. Lakin zaman keçdikcə beyin bu həyəcanı öyrənir və eyni reaksiyanı vermir. Bu, sevginin yox olması demək deyil, sadəcə münasibətlərin daha stabil bir mərhələyə keçməsi anlamına gəlir".

O, bildirib ki, evlilikdə ehtirası qorumaq mümkündür:

“İlk illərdəki həyəcanı daim eyni səviyyədə saxlamaq çətin olsa da, tərəflər öz münasibətlərini yeniləyə bilər. Bəzən adi bir səyahət, fərqli bir mühitdə vaxt keçirmək və ya yeni bir hobbi paylaşmaq münasibətlərə yeni nəfəs verə bilər”.

A.Məmmədova vurğulayıb ki, fiziki yaxınlıq da evlilikdə mühüm rol oynayır:

“Cütlüklər bir-birinə toxunmaqdan, sevgi ifadə etməkdən çəkinməməlidir. Kiçik toxunuşlar, göz təması, birgə vaxt keçirmək münasibətlərin emosional bağını gücləndirir”.

Bəsti Rəfizadə

Evlilik sevgini öldürür? – Psixoloqdan AÇIQLAMA