Əli Əsədov sosialyönlü xərclərin statistikasını açıqladı
“2024-cü ildə əhalinin sosial müdafiəsinin gücləndirilməsi məqsədilə dövlət büdcəsi xərclərinin 39%-i və ya 14,6 milyard manatı sosialyönlü xərclərin maliyyələşdirilməsinə yönəldilmişdir”.
Sfera.az xəbər verir ki, bunu Milli Məclisin bugünkü plenar iclasında Baş nazir Əli Əsədov Nazirlər Kabinetinin 2024-cü ildə fəaliyyəti haqqında hesabatın təqdimatı zamanı deyib.
“2024-cü ildə əhalinin sosial müdafiəsinin gücləndirilməsi məqsədilə dövlət büdcəsi xərclərinin 39%-i və ya 14,6 milyard manatı sosialyönlü xərclərin maliyyələşdirilməsinə yönəldilmişdir. 2024-cü ildə orta pensiya məbləği 12%, yaşa görə pensiya 11,3% artmış, yaşayış minimumu ölkə üzrə 270 manat müəyyən edilmişdir (9,8% artım). Bir ailəyə düşən sosial yardımın orta aylıq məbləği 475 manat olmuşdur.
Cənab Prezidentin davamlı islahatları çərçivəsində sosial məsələlərin həllinə daim diqqət göstərilir. Yanvarın 1-dən sosial sahədə növbəti artımlarla bağlı qərarlar qəbul olunmuşdur. Ümumiyyətlə, son bir neçə il ərzində 4 sosial paket həyata keçirilib və bu məqsədlər üçün 7 milyard manatdan çox vəsait xərclənib.
Bundan sonra da hökumətin əsas vəzifələrindən biri sosial və iqtisadi inkişafın paralel həyata keçirilməsidir”.
Əli Əsədov ötən il 800 mənzilin şəhid ailələri, müharibə əlillərinə və həssas təbəqədən olan digər şəxslərə verildiyini də vurğulayıb:
“Habelə 93 avtomobil müharibə əlillərinə təqdim edilmişdir. Həmçinin, hərbi qulluqçuların mənzillə təmin olunması ilə bağlı xərclər üçün 35 milyon manat vəsait ayrılmışdır”.
Firuzə Əliyeva
