MDB-də ən yüksək pensiya Azərbaycandadır - Müqayisə

Azərbaycan minimum və orta aylıq pensiyaların məbləğinin ABŞ dolları ilə ifadədə böyüklüyünə görə, MDB ölkələri, Gürcüstan və Ukrayna ilə müqayisədə 1-ci yerdədir. Həmçinin Azərbaycan minimum pensiyanın Alıcılıq Qabiliyyəti Pariteti (PPP) əsasında hesablanmış dollar ifadəsindəki məbləğinə görə də bu sıralamada ən yüksək yeri tutur.

Sfera.az Əmək və Əhalinin Sosial Müdafiəsi Nazirliyinə istinadən xəbər verir ki, 2025-ci ilin fevralın 1-də minimum pensiyanın nominal məbləği Azərbaycanda 188 dollar, Qazaxıstanda 184 dollar, Moldovada 149 dollar idi. MDB-də ən aşağı minimum pensiya Tacikistan (30 dollar) və Qırğızıstandadır (36 dollar). 
Alıcılıq qabiliyyəti ilə hesablandıqda da Azərbaycan minimum pensiya məbləğinə görə ilk sıradadır. Alıcılıq qabiliyyətinə görə minimum pensiyanın məbləği Azərbaycanda 645 dollar, Belarusda 593 dollar, Qazaxıstanda 575 dollar, Qırğızıstan və Tacikistanda isə 122 dollar təşkil edir. 

Orta aylıq pensiyanın nominal məbləğində də Azərbaycan digər ölkələri qabaqlayır. Pensiyaların orta aylıq nominal məbləği Azərbaycanda 316 dollar, Belarusda 272 dollar, Qazaxıstanda 254 dollar, Rusiyada 216 dollar, Tacikistanda 45 dollar olub. 

Alıcılıq qabiliyyətinə görə müqayisə etdikdə isə ən yüksək orta aylıq pensiya Belarusda (1 108 dollar), Azərbaycanda (1 083 dollar), Qazaxıstanda (794 dollar), Rusiyada (722 dollar) qeydə alınıb. Ən az orta pensiya məbləği Tacikistanda (184 dollar) olub.

Cənubi Qafqaz ölkələri arasında minimum nominal pensiya məbləği Ermənistanda 91 dollar, Gürcüstanda 117 dollar, alıcılıq qabiliyyəti ilə hesabladıqda Gürcüstanda   375 dollar, Ermənistanda 242 dollardır.

Orta nominal pensiya məbləği Gürcüstanda 130 dollar, Ermənistanda 124 dollar, alıcılıq qabiliyyəti ilə hesablandıqda isə Gürcüstanda 414 dollar, Ermənistanda 330 dollar olub. 

Vasif