"Uşaqlar oruc tuta bilər, zehin güclənir"- İlahiyyatçıdan AÇIQLAMA

Xəbər verdiyimiz kimi, martın  1-dən etibarən Ramazan ayı başlayıb. Azərbaycanda da inanclı insanlar 3 gündür oruc tuturlar. Müşahidələr göstərir ki, ölkəmizdə oruc tutanlar arasında şagirdlər də az deyil. Nəzərə alsaq ki, indi imtahan ərəfəsidir, oruc tutmağın buraxılış və blok imtahanlarına hazırlaşan şagirdlərin aktivliyinə necə təsir edəcəyi sual altındadır.

Maraqlıdır, şagirdlərin oruc tutmasında bir məhdudiyyət varmı? Ümumiyyətlə, neçə yaşdan etibarən oruc tutmaq olar?
 

Mövzu ilə bağlı Sfera.az-a açıqlamasında ilahiyyatçı Hacı Əli Rzazadə bildirib ki, şəriət qaydaları uşaqların oruc tutmasına müsbət yanaşır. 

Onun sözlərinə görə, yetkinlik yaşına çatmış hər bir şəxs oruc tuta bilər, çatmayanlar üçün isə bu, vacib deyil:

“Əgər şagird IV və ya V sinifdədirsə, onlar oruc tutmağa borcu deyil, önəmli olan təhsildir. Ənənəvi xürafatçılar iddia edir ki, qızlar 9, oğlanlar isə 15 yaşında yetkinlik yaşına çatır və yalnız həmin dövrdə oruc tutmağa başlaya bilərlər. Bu cür təbliğat aparırlar. Amma İslam dinində belə bir tələb yoxdur. Qızlar da, oğlanlar da 15 yaşından sonra oruc tuta bilərlər”.

 
İlahiyyatçı qeyd edib ki, ac qalmağın zehni gücləndirdiyi elmi cəhətdən də sübut olunub:

“Elm də sübut edir ki, insan ac qaldıqda onun zehnində güclü inkişaf baş verir, çox qida yemək insanın yaddaşını tənbəlləşdirir. Konkret olaraq "imtahana girən şagird oruc tuta bilər və ya bilməz" deyə bir meyar yoxdur. Əgər bir şəxs imtahanda, əsgərlikdə və hansısa digər çətin  şəraitdədirsə, oruc tutmaq, ac qalmaq ona ziyandırsa, özünü çox narahat hiss edirsə, oruc tutmaya bilər, bu kimi səbəblərdən orucunu pozsa, günah sayılmır”. 

Dinşünas Elşad Miri də mövzu ilə bağlı fikirlərini saytımızla bölüşüb. 

O bildirib ki, oruc tutmaq Allahın əmridir, istəyən tutar, istəməyən tutmaz:

“Oruc vaxtı insan imtahana gedir deyə, bunu pozmağın bir mənası varmı? Əksinə, bizə həmişə yemək yemədən imtahana getmək aşılanıb. Bu bir taktikadır və biz də həmişə ondan istifadə etmişik. Yenə də kimsə orucunu pozmaq istəyərsə, buna özü qərar verməlidir, heç kim qarışa bilməz”. 

E.Miri nəzərə çatıdırb ki, bir insan rəşiddirsə, ağlı başında, həyatı dərk edibsə, onun oruc tutması məqbuldur:

“Bu yaş dəyişib 9, 12 və ya 15 ola bilər. Bəzi müsəlman ölkələrində azyaşlılara əvvəlcə günortaya qədər oruc tutmaq tövsiyə olunur, növbəti dəfə onları günortadan sonra müddəti 1 saat artırmaqla orucluğa öyrəşdirməyə çalışırlar. Ümumilikdə, oruc tutmaq üçün heç bir yaş məhdudiyyəti yoxdur”.

Qeyd edək ki, martın 30-u Fitr (Ramazan) bayramıdır. Nazirlər Kabinetinin müvafiq qərarına əsasən, martın 30-u və 31-i Azərbaycanda Ramazan bayramı kimi qeyd olunacaq. Tam (11 illik) orta təhsil səviyyəsi üzrə buraxılış imtahanı isə iki zona olmaqla 9 mart tarixində keçiriləcək.

Firuzə Əliyeva