“Üsyankar kütlənin formalaşdırılmasına xidmət edən layihələr...”

“Üsyankar kütlənin formalaşdırılmasına xidmət edən layihələr gənclərin ictimai şüurunda “milli” və “dövlətçilik” kimi məfhumların dəyərsizləşdirilməsinə yönəlib”.

Sfera.az-ın APA-ya istinadən xəbərinə görə, bunu Prezident Administrasiyasının (PA) Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyev bildirib.

PA rəsmisi deyib ki, ictimai-siyasi münasibətlərdə sağlam mühitin təmin olunması məsələsi dövlətin strateji resursudur və bu amil bilavasitə milli təhlükəsizliyin təmin olunması vəzifəsi ilə əlaqəlidir: “Təsadüfi deyil ki, sabitliyə zərbə vurmaq istəyən qüvvələr öz təbliğatlarını məhz ideoloji müstəvidə aparırlar. Beynəlxalq təcrübəni nəzərə alaraq deyə bilərik ki, məkrli qüvvələrin mövcud istiqamətdəki təşəbbüslərinin strateji hədəfi konkret cəmiyyətdə etiraz mədəniyyətinin formalaşdırılmasıdır”.

“Xüsusən də qeyri-ənənəvi oriyentasiyalı gənclərdən istifadə olunur”

PA rəsmisi bildirib ki, digər ölkələrin yaxın tarixində buna dair örnəklər var: “Bu məqsədə nail olmaq üçün psevdoliberal şüarlardan və gənclərdən, xüsusən də qeyri-ənənəvi oriyentasiyalı gənclərdən istifadə olunur. Üsyankar kütlənin formalaşdırılmasına xidmət edən bu cür layihələr əsasən gənclərin ictimai şüurunda “milli” və “dövlətçilik” kimi məfhumların dəyərsizləşdirilməsinə yönəlib. Bunlar hamısı ideoloji müstəvidə Azərbaycana qarşı aparılan hibrid müharibənin bilavasitə tərkib hissəsidir”.

“Şübhə doğuran layihələrdə partiya üzvlərinin iştirakı qətiyyən yolverilməzdir”

Şöbə müdiri vurğulayıb ki, dövlətçilik mövqelərindən çıxış edən və xalqın rifahını arzulayan bütün siyasi partiyalar bu cür hallar ilə mübarizədə aktiv iştirak etməlidir: “Arzuolunmaz, şübhə doğuran layihə və tədbirlərdə partiya üzvlərinin iştirakı qətiyyən yolverilməzdir. Siyasi partiyalar təşkil etdikləri tədbirlərdə “milli təfəkkür”, “milli özünəməxsusluq”, “suverenlik”, “milli dəyərlər”, “milli özünüdərketmə” və digər bu kimi mövzulara xüsusi diqqət ayırmalıdırlar”.

"Qeyri-ənənəvi oriyentasiyalı gənclərdən istifadə olunur" - Ədalət Verdiyev