Hazırda Bakıda və Abşeron yarımadasında, eyni zamanda ölkənin əksər yerlərində qar yağır. Milli Hidrometeorologiya Xidmətindən verilən məlumata görə qarlı hava 3 gün davam edəcək.

Bəs qeyri-sabit hava şəraiti kənd təsərrüfatına necə təsir göstərir?

Mövzu ilə bağlı Sfera.az-a danışan kənd təsərrüfatı eksperti Cəfər İbrahimli bildirib ki, qar və soyuq hava şəraiti kənd təsərrüfatı sahəsinə müxtəlif təsirlər göstərə bilər:

"Qar təbii hadisə olaraq təbiətdə müsbət təsirlər yaratsa da, xüsusilə kənd təsərrüfatında bəzi ziyanlara yol açır. Bu ziyanlar əkin sahələri, məhsul yığımı, heyvandarlıq və digər kənd təsərrüfatı fəaliyyətlərinə birbaşa təsir edir. Qarın əriməsi isə torpaqda nəm miqdarını artırır. Bu bəzi bitkilər üçün zərərli ola bilər. Xüsusilə erkən əkilən taxıl və tərəvəzlərin kökləri çürüməyə başlayır. Həmçinin qar "şəffaf çadır" yaradaraq bitkilərin üzərində ağır yük olur. Bu, xüsusilə zərif bitkiləri əyir və ya qırılmasına səbəb olur.

Qar məhsul yığımına da mənfi təsir göstərir. Soyuq hava şəraiti ilə əlaqədar olaraq əkin sahələrindəki məhsul yığımı gecikir və bunun nəticəsində məhsulun keyfiyyəti aşağı düşür. Bununla yanaşı, ağır qar səbəbindən sahələrdə traktorlardan və digər yığım avadanlıqlarından istifadə etmək çətinləşir.Çox sərt və uzun müddət davam edən soyuq hava torpağı dondurur. Torpağın donması, bitkilərin köklərinin zədələnməsinə və onların inkişafının dayanmasına səbəb ola bilər. Bu, xüsusilə erkən əkilən tərəvəzlər üçün böyük təhlükə yaradır. Eyni zamanda, donmuş torpaqda çalışmaq daha çətin olur, əkin və becərmə işlərinin həyata keçirilməsi ləngiyir.Qarın çox olduğu dövrlərdə, xüsusilə dağlıq ərazilərdə heyvanların otlaması çətinləşir. Qış dövründə heyvanlara verilən yem və təbii qidalar əhəmiyyətli dərəcədə azalır, bu isə heyvanların sağlamlığına mənfi təsir edir".

Ekspert qeyd etdi ki, qar həmçinin kənd təsərrüfatı məhsullarının daşınmasında problemlər yaradır:

"Nəqliyyat infrastrukturunun pozulması kənd təsərrüfatı məhsullarının bazara vaxtında çatdırılmasına mane olur. Bu isə məhsulun keyfiyyətinin düşməsinə və bazarda qiymət artımına səbəb ola bilər.Heyvandarlıqla məşğul olan fermerlər, heyvanlarının qidalanması üçün yem ehtiyatlarını əvvəlcədən hazırlamalıdırlar. Eyni zamanda, su təminatına diqqət yetirilməli və qarlı havada suyun donması problemləri nəzərə alınmalıdır.Kənd təsərrüfatı fəaliyyətləri ilə məşğul olan sahələrdə, yolların təmizlənməsi və nəqliyyatın sürətlənməsi üçün tədbirlər görülməlidir.Qar və soyuq hava şəraitinin mümkün təsirlərinə qarşı əvvəlcədən planlama aparılmalı və kənd təsərrüfatı məhsullarının qorunması üçün innovativ üsullar tətbiq edilməlidir".

Ülkər Abdurahmanlı

Qarlı hava kənd təsərrüfatına necə təsir göstərir? - AÇIQLAMA