Nikahların sayı azalır, gənclər evlilikdən niyə qaçır? - Səbəblər AÇIQLANDI

Son illərdə dünyanın bir çox ölkələrində, o cümlədən Azərbaycanda gənclərin evliliyə yanaşmasında nəzərəçarpacaq dəyişikliklər baş verir. Dövlət Statistika Komitəsinin məlumatına görə, 2024-cü il ərzində ölkədə 49 min 508 nikaha daxilolma halları qeydə alınıb. Bu da ötən illərlə müqayisədə evlənənlərin sayında azalmanın olduğunu göstərir.

Bəs gənclərin evlənmək istəməməsinin əsas səbəbləri nədir?

Mövzu ilə bağlı Sfera.az-a danışan psixoloq Gülnar Orucova bildirib ki, əsas səbəb iqtisadi vəziyyətin çətinləşməsidir:

"İşsizlik, aşağı maaşlar, yüksək kirayə qiymətləri və həyatın zəruri ehtiyaclarına sərf edilən yüksək xərclər gəncləri nikahdan çəkindirir. Bir çox gənc ailə qurmaq üçün əvvəlcə maliyyə baxımından stabillik əldə etməyə çalışır. Buna görə də, evlilik kimi məsuliyyətli bir addımı atmaq çox vaxt təxirə salınır.Müasir dövrün gənclərinin əksəriyyəti isə daha çox karyera hədəfləri və şəxsi inkişafa yönəlir.  Təhsil almaq, peşəkar sahədə irəliləmək və şəxsi layihələr üzərində işləmək gənclər üçün prioritet addımlara çevrilib. Evlilik bəzən bu məqsədlərlə uyğun gəlmədiyi üçün gənclər öz həyatlarını karyera və şəxsi inkişaf istiqamətində formalaşdırmağa üstünlük verirlər".

Psixoloq vurğulayıb ki, günümüzdə, uğursuz evliliklərin sayı artmağa davam edir:

"Gənclər ailə həyatı qurmağı düşündüklərində yalnız öz maraqlarını deyil, ailələrinin və yaxınlarının gözləntilərini də nəzərə alırlar. Sosial təzyiqlər, bəzən evliliyə təkan verən bir faktor olsa da, digər tərəfdən, uğursuzluq qorxusu gəncləri bu addımı atmağa çəkindirir. Cəmiyyətdə uğursuz evliliklərin və boşanmanın artması, gənclərin evlilik məsələsini daha ciddi düşünmələrinə səbəb olur.Ənənəvi dəyərlərlə müasir düşüncələr arasındakı qarşıdurma da gənclərin evlilik qərarlarına təsir edən bir faktordur. Evlilik və uşaqların dünyaya gəlməsi ilə bağlı ailədən gələn təzyiqlər əvvəlki nəsillərdən fərqli olaraq, gənclər tərəfindən daha az qəbul edilir. Bunun əvəzinə gənclər daha çox şəxsi inkişaf, karyera və sərbəstlik istəyirlər. Gənclər sevgi və münasibətləri əvvəlki dövrlərdən fərqli şəkildə dərk edirlər. Ailəli olmaq bəziləri üçün daha çox məsuliyyət kimi başa düşülür".

Gülnar Orucova son olaraq diqqətə çatdırdı ki, gənclərin evlilikdən qaçma səbəbləri müxtəlidir və bu problemi həll etmək üçün hərtərəfli yanaşma tələb olunur:

"İqtisadi şəraitin yaxşılaşdırılması, təhsil proqramlarının təşviqi, psixoloji və sosial dəstəyin təmin edilməsi gənclərin evliliyə olan yanaşmalarını müsbət istiqamətdə dəyişdirə bilər". 

Ülkər Abdurahmanlı