"Turistik məkanların Türkiyə seriallarında göstərilməsi Azərbaycana marağı daha da artıracaq" - ŞƏRH
Prezident İlham Əliyev "Azərbaycan Respublikası Hökuməti ilə Türkiyə Respublikası Hökuməti arasında turizm sahəsində əməkdaşlıq haqqında Saziş”in təsdiq edilməsi barədə Fərman imzalayıb.
Maraqlıdır, bu Saziş ölkəmizdəki turizmin inkişafına hansı töhfələri verə bilər?
Mövzu ilə bağlı Sfera.az-a açıqlama verən turizm eksperti Ceyhun Aşurov bildirib ki, bu Sazişdə iki ölkə arasında turizmdə əməkdaşlıq, qanunvericilik, məlumat mübadiəsi, statistikanın təkmilləşdirilməsi, qastroturizmin tanıdılması ilə bağlı müəyyən addımlar əks olunub:
“2024-cü il 15 noyabrda Azərbaycanla Türkiyə arasında turizm sahəsində əməkdaşlıq haqqında Saziş imzalanmışdı. Artıq bugünkü Fərmanla Saziş qüvvəyə minmiş hesab olunur. Əvvəl də bir neçə dəfə Türkiyənin rəhbər orqanlarından olan Mədəniyyət və Turizm Nazirliyi ilə bizim Turizm Agentliyi arasında görüşlər olub, fikir mübadilələri aparılıb. Onsuz da iki ölkə sıx əlaqələrə malikdir, artıq bu Sazişlə turizm sahəsində birgə fəaliyyətin təşkil olunması və ölkənin turizm məkanlarının tanıdılması istiqamətində işlərin daha böyük çərçivələrdə görülməsinə şərait yaradılacaq. Bu Saziş həm də beynəlxalq təşkilatlarda da təmsil olunması ilə birgə fəaliyyəti, turizm sahəsində təhsil ilə bağlı əməkdaşlıq, invesitiyanın təşviqi, birgə turizm marşrutlarının yaradılması ilə bağlı işləri nəzərdə tutur”.
Onun sözlərinə görə, Türkiyə turizmlə bağlı TOP10-da olan ölkələrdən biridir və onlarla bərabər paralel addım ataraq birgə məkanın tanıdılmasını həyata keçirmək Azərbaycana daha çox turistin gəlməsinə, ölkənin daha çox tanınmasına xidmət etmiş olacaq:
“Türkiyə turizmdə öz sözünü demiş dövlətdir. Keçənilki statistikalarında kifayət qədər ciddi rəqəmlərin olması da bunu sübut edir. Ölkəyə 61,1 milyondan çox turistin gəlməsi, turizm sektorunun 60 milyard dollardan çox gəlir əldə etməsi Türkiyəni bu sahədə dünyanın ən lider ölkələri siyahısına daxil edib. Azərbaycanın da Türkiyə ilə turizm istiqamətində birgə fəaliyyəti ölkəmizin turizminin inkişafına və turist axınına ciddi şəkildə öz təsirini göstərə bilər”.
Ekspert qeyd edib ki, burada digər məqam ölkənin turizmlə bağlı maraqlı yerlərinin Türkiyə film və seriallarında da istifadə edilməsi və tanıdılmasıdır:
“Bu da daha geniş izləyici kütləsinə çatmaq deməkdir. Bildiyimiz kimi, türk serialları xüsusən körfəz, ərəb və rusdilli ölkələrdə çox məşhurdur. Gələcəkdə Azərbaycan məkanlarının da oraya daxil olması ölkəmizə olan marağı daha da artıracaq”.
Firuzə Əliyeva
Mövzu: Azərbaycan Respublikasının dünya birliyinə inteqrasiyası, region ölkələri və digər dövlətlərlə, beynəlxalq təşkilatlarla əməkdaşlığının inkişaf etdirilməsi.
Qeyd: Bu yazı Medianın İnkişafı Agentliyinin dəstəyi ilə hazırlanıb.
