Azərbaycan ötən il qida məqsədilə yağ idxalına 400 milyon dollardan artıq vəsait xərcləyib. Bu qədər vəsaitlə 211 min tona yaxın yağ alınıb. Xərclənən vəsaitin təxminən yarısı bitki mənşəli, digər yarısı heyvan mənşəli yağlara alınmasına ayrılıb.

Sfera.az Dövlət Gömrük Komitəsinin və Dövlət Statistika Komitəsinin açıqladığı məlumatlara istinadən xəbər verir ki, yağ növləri arasında ən çox pul kərə yağının idxalına sərf olunub.

2024-cü ildə ölkəmizə 24 507 ton kərə yağı idxal edilib. Bu qədər yağın alınmasına 139,5 milyon dollar pul ayrılıb. Bir kiloqram kərə yağının idxal xərci 9,67 manata başa gəlib. Kərə yağı ilə yanaşı 5 104 ton süddən alınan digər yağlar idxal edilib. Onların idxalına 34,1 milyon dollar xərclənib. Süddən alınan digər yağların bir kiloqramı 11,4 manata başa gəlib.

Bitki mənşəli yağlar arasında daha çox vəsait palma yağlarının alınmasına xərclənib. 2024-cü ildə 82,2 milyon dollar dəyərində 64,8 min tona yaxın palma yağı alınıb. Palma yağının bir kiloqramı 1,34 manat olub. Günəbaxan yağı idxalına çəkilən xərc də böyükdür. Bir ildə xaricdən alınan 66,8 min ton günəbaxan yağı üçün 73,7 milyon dollar pul ayrılıb. Bir kiloqram günəbaxan yağının idxal qiyməti 1,88 manata başa gəlib.

Azərbaycan bir ildə 19 min tondan artıq günəbaxan yağı da alıb. Günəbaxan yağının idxal xərci 26,61 milyon dollar təşkil edib. Günabaxan yağının hər kiloqramına orta hesabla 2,4 manat ödənilib. Ötən il zeytun yağının idxal miqdar isə 1944 ton olub. Zeytun yağının idxalına ümumilikdə 8,96 milyon dollar xərclənib. Zeytun yağının bir kiloqramı 7,84 manata başa gəlib.

Adıçəkilən yağlardan başqa ölkəmizə soya, araxis, pambıq, kokos, raps, xardal, kətan yağı, gənəgərçək yağı, küncüt yağı da idxal edilib. Məlumatların təhlili göstərir ki, yağlar arasında ən bahalısı süddən alınan yağlar, ən ucuzu palma yağıdır. Son illərdə dəyər ifadəsində idxalı ən çox artan isə palma və kərə yağı olub. Palma yağının idxalına çəkilən xərcin artması idxal miqdarının artması ilə bağlıdırsa, kərə yağına çəkilən xərcin artması qiymətlərin yüksəlməsi ilə əlaqəlidir.

Vasif

Ölkəyə ən çox palma yağı gətirilib - Tələbat çoxdur...