Uşaq bağçalarının tələb etdikləri daha bir sənəd rəqəmsallaşdı
Uşaq bağçalarının valideynlərdən tələb etdikləri daha bir sənəd rəqəmsallaşıb.
Bu barədə Sfera.az-a Məktəbəqədər və Ümumi Təhsil üzrə Dövlət Agentliyindən (MÜTDA) məlumat verib.
Belə ki, Elm və Təhsil Nazirliyi (ETN) ilə TƏBİB arasında əməkdaşlıq çərçivəsində təhsil müəssisələrində sənəd dövriyyəsinin rəqəmsallaşdırılması istiqamətində məktəbəqədər təhsil müəssisələrinin elektron sisteminə sağlamlıq haqqında tibbi arayışlar inteqrasiya olunur.
Bildirilir ki, məktəbəqədər təhsil müəssisələrinə qəbul zamanı tələb olunan sağlamlıq haqqında tibbi arayışların elektronlaşdırılması təmin edilib:
“Artıq tibbi arayışlar birbaşa “Məktəbəqədər Təhsil Müəssisələrinə Uşaqların Qəbulu” elektron sisteminə ötürüləcək. Məktəbəqədər təhsil müəssisəsinə qəbul olmuş uşağın valideyni (digər qanuni nümayəndəsi) elektron sistemdə müraciəti qəbul edildikdən sonra sağlamlıq haqqında tibbi arayışını əldə etmək üçün müvafiq poliklinikaya müraciət edir. Müayinə tamamlandıqdan sonra arayış 48 saat ərzində bq.edu.az portalında valideynin şəxsi kabinetinə və təhsil müəssisəsinin sisteminə əlavə olunur. Məktəbəqədər təhsil müəssisələrinin rəhbərləri sağlamlıq haqqında tibbi arayışları elektron sistem üzərindən əldə edə bilərlər. Həmçinin məktəbəqədər təhsil müəssisəsinə qəbul olan uşağın valideyni (digər qanuni nümayəndəsi) bq.edu.az portalına daxil olaraq elektron tibbi sağlamlıq arayışını əldə edə bilər”,-məlumatda qeyd olunur.
Firuzə Əliyeva
