Azərbaycan şəhərlərində və rayonlarında küçələrin zibillənməsi uzun illərdir, mövcud olan ekoloji və sosial problemlərdən biridir. Xüsusilə böyük şəhərlərlə bağlı olan bu məsələ ictimai müzakirələrin əsas mövzularından birinə çevrilib. Mərkəzi küçələrdə, parklarda, məhəllələrdə hər addımbaşı zibil qablarının olmasına baxmayaraq, insanlar hələ də zibilləri yerə atırlar.

Sfera.az bildirir ki, küçələrin zibillənməsinin bir neçə əsas səbəbi var.

Belə ki, bəzi vətəndaşlar məişət tullantılarını düzgün şəkildə atmağa məsuliyyətli yanaşmır. Xüsusilə piyadaların sıx olduğu ərazilərdə kifayət qədər zibil qutularının olmaması və ya vaxtında boşaldılmaması tullantıların ətrafa atılmasına səbəb olur.

Həmçinin əvvəlki cərimə sisteminin təsirli olmaması və qanunvericiliyin icrasında problemlər insanların məsuliyyətsiz davranışlarına yol açıb.

Bu problemin həlli üçün Azərbaycan hökuməti küçələri zibilləyən şəxslərə qarşı cərimələri sərtləşdirmək qərarına gəlib.

Belə ki, məişət tullantılarının tutumlardan (urnalardan) kənar yerlərə atılmasına görə cərimə artırılıb.

Bu barədə bizə açıqlamasında vəkil Turan Abdullazadə bildirib ki, bu, İnzibati Xətalar Məcəlləsinə edilən dəyişiklikdə öz əksini tapıb:

“Qanuna əsasən, məişət tullantılarının tutumlardan (urnalardan) kənar yerlərə atılmasına görə əvvəl əlli manat məbləğində olan cərimə artıq 300 manata qaldırılıb. Belə ki, məişət tullantılarının tutumlardan (urnalardan) kənar yerlərə atılmasına görə fiziki şəxslər üç yüz manat məbləğində, vəzifəli şəxslər min manat məbləğində, hüquqi şəxslər dörd min manat məbləğində cərimə ediləcək. Nəzərdə tutulmuş xətanın inzibati tənbeh almış şəxs tərəfindən inzibati tənbeh vermə haqqında qərar qüvvəyə mindiyi gündən bir il ərzində təkrar törədilməsinə görə fiziki şəxslər min manat məbləğində, vəzifəli şəxslər min beş yüz manatdan iki min manatadək məbləğdə cərimə edilir, yaxud işin hallarına görə, xətanı törədənin şəxsiyyəti nəzərə alınmaqla, altmış saatdan yüz saatadək ictimai işlər tətbiq olunur, hüquqi şəxslər beş min manatdan yeddi min manatadək məbləğdə cərimə edilir”.

Bu problemlərin qarşısının alınması üçün dövlət qurumları da bir sıra işlər həyata keçirilir.

Daxili İşlər Nazirliyinin (DİN) Mətbuat Xidmətinin əməkdaşı polis leytenantı Lumu İsrəfilli Sfera.az-ın sorğusuna cavab olaraq bildirib ki, paytaxtda, respublikanın digər şəhər və rayonlarında ətraf mühitin çirkləndirilməsi, məişət və istehsalat tullantılarının zibil qutularından kənar yerlərə atılması nəticəsində antisanitar vəziyyətin yaranması ilə əlaqədar polis əməkdaşları digər aidiyyəti qurumlarla birgə mütəmadi olaraq tədbirlər həyata keçirir.

“Antisanitar vəziyyət aşkarlandığı ərazilərdə mənfi hallara yol verən şəxslər barəsində İnzibati Xətalar Məcəlləsinin müvafiq maddəsinə əsasən inzibati tənbeh tədbiri tətbiq edilir. Həmçinin vətəndaşlarla ətraf mühitin çirkləndirilməsinin məsuliyyət yaratması barədə maarifləndirici söhbətlər aparılır, küçə və prospektlərdə məişət tullantılarının tutumlara (urnalara) atılmasına təşviq olunur.Bir daha vətəndaşlara sanitar-gigiyena qaydalarına riayət etməyi, məişət və istehsalat tullantılarını zibil qutularından kənar yerlərə atmamağı tövsiyə edirik”, - məlumatda qeyd olunub.

Bu qaydalar küçələrin təmizliyini təmin etmək, ekoloji tarazlığı qorumaq və vətəndaş məsuliyyətini artırmaq məqsədilə tətbiq edilir. Nəticələrinin necə olacağı maraqla gözlənilir. Azərbaycan şəhərlərinin təmiz saxlanılması üçün həm dövlətin, həm də vətəndaşların üzərinə böyük məsuliyyət düşür. Yeni cərimə sistemi bu istiqamətdə mühüm addım olsa da, uzunmüddətli həll üçün ictimai şüurun formalaşması əsas rol oynayacaq.

Firuzə Əliyeva

Azərbaycanda bunu edənlər 300 manat CƏRİMƏLƏNƏCƏK