Ötən həftə DİN 2024-cü ildə kiber müdaxilə yolu ilə bank kartlarından ümumilikdə 22 milyon manat vəsaitin talanması haqqında məlumat paylaşıb. Məlumata görə, ötən il təxminən 178 pensiyaçı aldadılıb.

Maraqlıdır, dələduzların qurbanı olmamaq üçün nələrə diqqət etmək lazımdır?

Sfera.az xəbər verir ki, mövzu ilə bağlı fikir bidirən İKT üzrə mütəxəssis Osman Gündüz bu rəqəmin Azərbaycan üçün çox böyük olduğunu deyib.

Onun sözlərinə görə, bu, sektorda ciddi problemlərin olmasından xəbər verir:

“Qeyd olunurdu ki, bu cinayətlərin 178-i "bankomatdan pul çıxarılmasına kömək adı ilə" vətəndaşın aldadılması yolu ilə həyata keçirilib. Düşünmək olar ki, bu üsulla aldadılanların əksəriyyəti pensiyaçılar olub. Əlbəttə, çox təəssüfləndiricidir. Təsəvvür edək, 178 pensiyaçı bir ay pulunu gözləyir, son anda onu hansısa kiberdələduz “yardım etmək” məqsədilə kart nömrəsi, PIN kodu və digər vacib məlumatları ələ keçirməklə mənimsəyir. Kimdir günahkar? Fikrimcə, hamımız. Cəmiyyət bunun fərqində olmalıdır. Əlbəttə, ilk növbədə pensiyaçı diqqətli olmalıdır, amma pensiyaçını günahlandırmaq da doğru olmazdı.İlk növbədə, bu 178 pensiyaçı hansı bankın müştərisidirsə, daha çox məsuliyyət daşıyan da onlardır, daha çox vəzifə onların üzərinə düşür”.

O.Gündüz vurğulayıb ki, banklar müştərilərinin təhlükəsizliyini qorumaq üçün daha ciddi işlər aparmalı, bura resurslar ayırmalıdır:

“Xüsusilə də pensiyaçılar üçün əlavə tədbirlər görülməlidir. Pensiyaçıların kartları ilə bağlı əlavə təhlükəsizlik tədbirləri görülə bilər. Bütün bankomatların ətrafı müşahidə kameraları ilə təmin edilməli və onlar daim işlək vəziyyətdə olmalıdır. Eyni zamanda, aidiyyəti dövlət qurumları tərəfindən yaşlı insanlara kiber fırıldaqçıların üsulları izah edilməli və onların heç bir halda bank kartı məlumatlarını, PIN kodlarını və SMS təsdiq kodlarını başqalarına verməmələri tövsiyə olunmalıdır.Ailə üzvləri də yaşlı insanlara kartlarındakı vəsaitlərdən istifadə ilə bağlı daim nəzarət etməlidir. Ailə üzvlərinin onlara bank adından, yaxud dövlət qurumları adından bank kartı ilə bağlı hansı zənglər və mesajların gəldiyi barədə məlumatlı olmaları təhlükəsizlik baxımından önəmlidir".

Firuzə Əliyeva

"Pensiyaçılar üçün əlavə tədbirlər görülməlidir" - Banklara TƏKLİF