İş prosesində əmək qabiliyyətini itirən mina təmizləyənlərin hüquqları necə qorunur?

Zaman-zaman mina təmizləyən şəxslərin bədbəxt hadisələrlə qarşılaşdığı barədə hadisələrin şahidi oluruq. Bunların nəticəsində bir sıra şəxslər vəfat edib və ya ciddi xəsarətlər alıblar.

Maraqlıdır, həmin şəxslərlə bağlı hansı tədbirlər nəzərdə tutulur? Onların əmək hüquqları necə qorunur?

Bununla bağlı Sfera.az-a açıqlama verən Vətəndaşların Əmək Hüquqlarını Müdafiə Liqasının sədri Sahib Məmmədov deyib ki, əgər iş zamanı şəxsin başına bədbəxt hadisə gələrsə, bu, istehsalatda bədbəxt hadisə hesab olunur:

“Bu halda vəfat edənin ailəsinə şəxsin əmək pensiyası yaşına çatana qədər alacağı əməkhaqqı toplu halında verilir. Şəxs vəfat etmirsə, sadəcə əmək qabiliyyətini itirirsə, məsələn, əli, ayağı amputasiya olunursa, bu halda ona 65 yaşına çatana qədər itirdiyi peşə əmək qabiliyyətinin faizinə uyğun sığorta ödənişi verilir. Tutaq ki, 1000 manat orta aylıq əməkhaqqı alırdısa və peşə əmək qabiliyyətini 50 % itiribsə, deməli, 65 yaşına çatana qədər hər ay 500 manat alacaq. Üsətlik, Dövlət Sosial Müdafiə Fondu ona əlavə əlilliyə görə əmək pensiyası təyin edir”.

S.Məmmədov bildirdi ki, bu, fərqli statusun verilməsindən daha sərfəlidir:

“Amma hərbi qulluqçu mina təmizləyərkən bədbəxt hadisə baş verirsə, bu artıq başqa şəkildə hesablanır. Odur ki, bu fərq aradan qaldırılmalıdır. Hərbçi mina təmizləmə işində iştirak edirsə, bu halda o, mülki işçi kimi sığortalansa, yaxşıdır”.

Günay