Dövlət əleyhinə xərclənən MİLYONLAR – USAİD-in ölkəmizdəki fəaliyyətiARAŞDIRILMALIDIR

Məlum olduğu kimi, ABŞ Beynəlxalq İnkişaf Agentliyinin (USAID) ləğvi prosesinə start verilib. ABŞ Dövlət İdarəetməsinin Səmərəliliyi Departamentini (DOGE) idarə edən İlon Mask "X" sosial şəbəkəsində paylaşımında bu barədə məlumat verib. O qeyd edib ki,  “USAİD bərpa oluna bilməz”.

 

USAİD-in korrupsiya qalmaqalı
 

Bundan əlavə, USAİD-in Vaşinqtonda yerləşən baş qərargahı administrasiyanın qərarı ilə bağlanıb. Üstəlik, təşkilatın fəaliyyəti ilə bağlı bir sıra qanunsuzluqlar da üzə çıxıb. Belə ki, ABŞ Dövlət Departamentinin Mətbuat xidməti tərəfindən yayılan yazılı bəyanatda USAID proqramlarının əhəmiyyətli hissəsinin ABŞ-ın əsas maraqlarına cavab vermədiyi qeyd olunub:

“USAID öz ilkin təyinatından çoxdan kənara çıxıb. İndi tam aydındır ki, USAID-in maliyyələşməsinin əhəmiyyətli hissəsi Birləşmiş Ştatların əsas milli maraqları ilə bağlı deyil".
 

Digər mühüm məqam isə ondan ibarətdir ki, USAİD korrupsiyada, yəni ehtiyacı olan ölkələrə və icmalara yardım proqramına yönəldilməli olan vəsaitlərin oğurlanmasında ittiham olunur. Eyni zamanda, İlon Mask açıq şəkildə USAİD-i cinayətkarlıqda ittiham edib.

USAİD-in Azərbaycandakı qaranlıq fəaliyyəti

USAİD 34 ilə yaxın Azərbaycanda fəaliyyət göstərib. Amma bu fəaliyyət çox qaranlıq və şübhəli olub. Bu gün usaidçilər bar-bar bağırırlarlar ki, ötən dövrdə Azərbaycana 450 milyon dollar yardım edilib. Ancaq “yardımların” statistikası və hara xərclənməsi nədənsə açıqlanmır.
 

Lakin araşdırmalarımız nəticəsində məlum olub ki, Həmin 450 milyonun böyük hissəsi Azərbaycana qarşı bir sıra təxribatların törədilməsinə xərclənib.
 

Məsələn, III Respublika Platforması adlı təxribatçı qurumun yaradılması birbaşa USAİD-lə bağlıdır. Belə ki, USAİD rəhbəri Samanta Pauerdən gələn sifariş əsasında qurulmuş platformanın məqsədi 2024-cü il 7 fevrala təyin edilmiş seçki ərəfəsində təxribat aksiyaları törətmək idi. “Demokratik Təşəbbüslər İnstitutu”nun rəhbəri Akif Qurbanovun koordinatorluğu ilə yaradılmış bu platforma müəyyən təxribatlar törətsə də, Azərbaycan hüquq-mühafizə orqanlarının sayıqlığı nəticəsində tezliklə zərərsizləşdirilə bildi.
 

Eyni zamanda, qaçaqmalçılıqda ittiham olunan “Toplum TV” üzvlərinin də qrant aldığı təşkilatlar arasında USAİD-in də adı xüsusi qeyd olunur.

USAİD-in COP29 təxribatı
 

Bundan əlavə, USAİD həm də ölkəmizdə müxtəlif “KİV və QHT”-lərin əsas donoru, qrant verənidir. Belə ki, təşkilat “COP29 tədbirləri ərəfəsində Azərbaycandakı erməni əsirlərin azad olunması” kampaniyasına start verilməsi üçün “qrant layihələri” ayrılıb.
 

Xatırladaq ki, ötən ilin oktyabrında ABŞ-da Azərbaycan qarşı növbəti çirkin kampaniya başladı. Hətta 60 konqresmen ABŞ-ın sabiq dövlət katibi Antoni Blinkenə müraciət etdi ki, COP29 ərəfəsində Azərbaycana təzyiqlər artırılsın və COP29-un baş tutmaması üçün bütün addımlar atılsın. Həmin kampaniyanın maliyyəçisi də USAİD idi.
 

Çünki bu qurumun mahiyyəti pozuculuq və ara qarışdırmaqdır.
 

USAİD-in təxribatçı fəaliyyəti amerikalı ekspertlər tərəfindən də etiraf edilib. Məsələn, ABŞ-ın Tennessi Texnologiya Universitetində siyasi elmlər üzrə professoru  Maykl Gunter ötən ilin oktyabrında Bizim.Media-ya müsahibəsində bildirmişdi ki, USAİD rəhbərliyi Azərbaycan və Türkiyəyə qarşı qərəzlidir:
 

“USAİD rəhbəri Samantha Pauerin Türkiyə və Azərbaycana qarşı qərəzli mövqeyi açıq-aydın ortadadır. Onun yazdığı "A Problem from Hell" adlı kitabının birinci fəslində Osmanlı dövründə ermənilərin "soyqırım" qurbanı olduğunu iddia edilir. Lakin o, 1992-ci ildə Xocalıda baş vermiş qətliamı və digər faktları qeyd etmir”.

USAİD-in Azərbaycandakı fəaliyyəti araşdırılmalıdır
 

Ona görə də USAİD-dən son 34 ildə Azərbaycanda xərcləndiyi iddia olunan 450 milyon dollar vəsaitin hesabatını tələb etməliyik. Eyni zamanda, ölkəmizin hüquq-mühafizə orqanları həmin 450 milyonun kimlərə verildiyi və hansı qanunsuz məqsədlər üçün xərcləndiyini araşdırmalıdır.
 

Əminliklə demək olar ki, bu vəsaitin böyük hissəsi Azərbaycan dövlətçiliyinin və milli maraqlarımızın əleyhinə xərclənib. Ona görə də vəsaitin xərclənmə istiqamətləri müəyyən edilməli, həmin vəsaitdən şəxsi maraqları və dövlət əleyhinə istifadə etmiş şəxslər ən ağır şəkildə cəzalandırılmalıdır.

USAİD nədir?

Qeyd edək ki, USAİD 1961-ci ildə ABŞ-ın sabiq prezidenti Co Kennedinin sərəncamı ilə yaradılıb. Qurumun əsas hədəfi kimi inkişaf etməkdə olan ölkələrə maddi və mənəvi dəstək verilməsi göstərilir. Əslində isə təşkilat həmin ölkələri öz çətiri altına alıb, onlardan ABŞ-ın siyasi və iqtisadi maraqları üçün istifadə etmək üçün çalışır.
 

Təsadüfi deyil ki, USAİD birbaşa rəsmi Vaşinqton tərəfindən idarə olunur. Hətta qurumun rəhbəri Senatın razılığı ilə ABŞ prezidenti tərəfindən təyin edilir. Bundan başqa ABŞ-da Federal büdcənin 1 faizi hər il USAİD-ə  ötürülür.

Bizim.Media