Aktau yaxınlığındakı təyyarə qəzası ilə bağlı ilkin nəticələr açıqlanacaq - BU TARİXDƏ

Qazaxıstan Nəqliyyat Nazirliyi “Azərbaycan Hava Yolları” QSC-nin (AZAL) Aktau yaxınlığında qəzaya uğraması ilə bağlı apardığı təhqiqatın ilkin nəticələrini yaxın bir neçə gün ərzində açıqlamağı planlaşdırır.

Sfera.az xəbər verir ki, bu barədə Qazaxıstanın nəqliyyat naziri Marat Karabayev mətbuat konfransında bildirib.

"İş son mərhələdədir və biz bir neçə gün ərzində saytımızda ilkin hesabatı dərc edəcəyik. Mütəxəssislərə işlərini yekunlaşdırmaq üçün vaxt lazımdır”, - Karabayev izah edib. 

Onun sözlərinə görə, işdə Qazaxıstan, Braziliya, Rusiya və Azərbaycan komandaları iştirak edir.

Qeyd edək ki, təyyarə qəzasını Qazaxıstan araşdırır. Astana daha əvvəl bildirib ki, Rusiya və Azərbaycana da araşdırma materiallarına çıxış imkanı verib. Qəzaya uğrayan təyyarənin uçuş yazıcılarının şifrəsi isə istehsal olunduğu ölkədə - Braziliyada açılıb.

Xatırladaq ki, dekabrın 25-də Bakıdan Qroznı şəhərinə uçan AZAL-a məxsus "Embraer 190" təyyarəsi Qazaxıstanın Aktau şəhəri yaxınlığında qəza enişi edib. Təyyarədə 5 ekipaj üzvü və Azərbaycan, Rusiya, Qazaxıstan, və Qırğızıstan vətəndaşları olan 62 sərnişin olub. 38 nəfər həlak olub, 29 nəfər isə sağ qalıb.

Firuzə Əliyeva