Prezident İlham Əliyev “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı”nı təsdiq edib. Dövlət Proqramının həyata keçirilməsinə dair Tədbirlər Planında yer alan məsələlərdən biri dövlət orqanları, təhsil və tibb müəssisələrinin iş rejiminin dəyişkən iş qrafikinə keçməsi ilə bağlıdır.

Maraqlıdır, iş qrafikinin təşkili tıxac problemini həll edə biləcəkmi?

Mövzu ilə bağlı Sfera.az-a açıqlama verən deputat Vüqar Bayramov bildirdi ki, Proqramın məqsədi Bakı şəhərində və ətraf ərazilərdə dayanıqlı nəqliyyat sisteminin qurulması, sərnişin mobilliyinin keyfiyyətinin artırılması və yol-nəqliyyat hadisələrinin, habelə ekologiyaya dəyən ziyanın həcminin azaldılması üçün zəruri tədbirlər görülməsidir.

Onun sözlərinə görə, bütövlükdə, Dövlət Proqramı Bakı və ətraf ərazilərdə nəqliyyat infastrukturunun inkişaf etdirilməsi və sıxlığın aradan qaldırılmasını nəzərdə tutur:

“Təbii ki, bu tədbirlərlə yanaşı, bir sıra keyfiyyət islahatları da aparılacaq. Bu, xüsusən də, iş saatlarında dəyişkən qrafikdən istifadə olunması, eyni zamanda məktəbli avtobusu sisteminin genişləndirilməsi kimi tədbirlər özündə ehtiva edir. Dəyişən iş qrafiki ilə bağlı mütəmadi təkliflərimizi təqdim etmişik. Nəzərə alsaq ki, dəyişkən iş qrafiki bir sıra inkişaf etmiş ölkələrdə tətbiq olunur və bunun da əsas mahiyyəti məhz dövlət qurumları, eləcə də, özəl sektor, o cümlədən, tibb müəssisələri və məktəblərdə fərqli saatlarda işə başlamaq və iş vaxtının bitməsindən ibarətdir. Bu praktiki olaraq sıxlığa təsir göstərən vacib keyfiyyət meyarlarından biridir. Fərqli saatlarda işə başlamaq nəticə etibarilə nəqliyyata tələbi, eyni zamanda şəxsi avtomobillərdən istifadəni saatlar üzrə şaxələndirəcək. Bu da eyni saatda daha az nəqliyyat vasitəsinin istifadə olunması mənasına gəlir. Ona görə də əksər Avropa ölkələrində olduğu kimi Azərbaycanda da bu sistemin tətbiq edilməsi praktiki olaraq sıxlığın azalmasına gətirib çıxara bilər”.

Firuzə Əliyeva

İş qrafikinin təşkili tıxac problemini həll edəcəkmi? - AÇIQLAMA