"Səfirlik bu şəxslərə kompensasiya ÖDƏMƏLİDİR" - AÇIQLAMA

Ötən gün Almaniya səfirliyində Azərbaycan vətəndaşının pasportunun itməsi ilə bağlı məlumat yayılıb. Belə ki, vətəndaş Almaniyanın Azərbaycandakı Səfirliyinə viza üçün müraciət edib. Amma günlər keçsə də, cavab ala bilməyib. Buna görə də yenidən səfriliyə müraciət edib. Səfirlikdən bildirilib ki, pasport itib. Bildirilib ki, yeni pasport alıb gəlsə, həmin viza 24 saat ərzində vurulacaq. Vətəndaş ASAN Xidmətə 10 manat cərimə, 210 manat isə 1 günə hazır edilməsi üçün pul ödəyib. Almaniya Səfirliyi isə bildirib ki, yalnız pasport hazırlanması üçün minimum məbləğ, yəni 50 manat ödəyəcəklər. 

Maraqlıdır, səfirlik vətəndaşa  kompensasiya ödəməlidirmi? Bu cür hallar baş verdikdə səfirlik hansı addımları atmalıdır?

Mövzu ilə bağlı Sfera.az-a açıqlama verən vəkil Turan Abdullazadə bildirib ki, bu vəziyyətdə vətəndaş haqlıdır:

“Mülki Məcəllənin 1100-cu maddəsinə görə, dövlət orqanlarının, yerli özünüidarə orqanlarının və ya bu orqanların vəzifəli şəxslərinin qanunsuz hərəkətləri (hərəkətsizliyi) nəticəsində, o cümlədən dövlət orqanının və ya yerli özünüidarə orqanının qanuna və ya digər hüquqi akta uyğun gəlməyən aktının qəbul edilməsi nəticəsində fiziki və ya hüquqi şəxsə vurulmuş zərərin əvəzini Azərbaycan Respublikası və ya müvafiq bələdiyyə ödəməlidir.

Əgər səfirlik pasportu itiribsə, vətəndaş səfirliyə qarşı ərizə ilə müraciət edib, çəkdiyi xərci və vaxt itirdiyinə görə əlavə kompensasiya tələb etmək haqqına sahibdir. Əgər məbləğ ödənilməsə, məhkəməyə müraciət edə bilər. Əgər dövlət orqanının ucbatından belə hadisə baş veribsə, orqan əməkdaşının etdiyi hərəkət görə məsuliyyət daşıyır. Həmin qurum sonra vətəndaşa ödənilən məbləği əməkdaşından tələb edə bilər”.

Firuzə Əliyeva