Laçın hava limanının fəaliyyəti turizmə necə təsir edəcək? - ŞƏRH
Azərbaycanda doqquzuncu beynəlxalq hava limanı bu il Laçında istifadəyə veriləcək. Bu barədə dünən Azərbaycan Prezidenti İlham Əliyev nəqliyyat məsələlərinə həsr olunan müşavirədə çıxışı zamanı deyib.
Maraqlıdır, Laçın hava limanının fəaliyyəti turizmə hansı formada təsir edəcək?
Bununla bağlı Sfera.az-a açıqlama verən iqtisadçı deputat Vüqar Bayramov deyib ki, Laçın hava limanı işğaldan azad edilmiş bölgələrimizdə inşa ediləcək və istifadəyə veriləcək üçüncü hava limanı olacaq:
“Bundan əvvəl Füzulidə və Zəngilanda hava limanları istifadəyə verildi. Laçın hava limanı Azərbaycan üçün həm də iqtisadi baxımdan vacibdir. Çünki Laçının kifayət qədər iqtisadi potensialı var, daxili və xarici turizm sahəsində imkanları yüksəkdir. Nəzərə alsaq ki, Laçında yalnız yay-qış turizmi deyil, həm də dini, mədəni, tarixi turizm imkanları mövcuddur, bu da təbii ki, gəlmə və daxili turizm üçün yeni potensial deməkdir”.
Millət vəkili qeyd etdi ki, hər bir ölkədə hava limanları nəqliyyat və logistikanın inkişaf etməsi, eləcə də investisiyanın cəlbi baxımından önəmlidir:
“Şərqi Zəngəzura xarici investisiyanın cəlb edilməsi kreativ məsələlərdən biridir. Ona görə də işğaldan azad edilmiş ərazilərimizdə qurulan hava limanları həm də həmin bölgələrə xarici investisiyanın cəlb edilməsinə, burada iqtisadiyyatın daha qısa zamanda formalaşmasına, reinteqrasiyasına yardım edəcək”.
Qeyd edək ki, son 20 il ərzində Azərbaycanda səkkiz beynəlxalq hava limanı inşa edilib. Bunlar Bakı, Naxçıvan, Gəncə, Lənkəran, Qəbələ, Zaqatala, Füzuli və Zəngilan hava limanlarıdır.
Günay Rəsulqızı
