Yollarda gözlənilməz qəzalarla yanaşı, buna səbəb olan amillər də kifayət qədərdir. Bu, bəzən texniki məsələlərlə bağlı ola bilər, bəzən də səhlənkarlıqla...Sözügedən və hər bir vətəndaş üçün əhəmiyyət kəsb edən problemlərdən də biri yollarda quraşdırılan işıq dirəkləri ilə bağlıdır. Yəqin, əksəriyyət paytaxt küçələrində var olan, amma işlək vəziyyətdə olmayan dirəklərlə qarşılaşıb.

Sfera.az bildirir ki, bu cür hallar yollarda təhlükəli vəziyyətin yaranmasına səbəb olur. Bir çox küçə və prospektdə işıq dirəklərinin yetərincə işləməməsi və ya ümumiyyətlə, olmaması vətəndaşların narazılığına səbəb olur. Bu, xüsusilə gecə saatlarında, yağışlı havalarda yol təhlükəsizliyini azaldır. Bəzi ərazilərdə qəzalar nəticəsində işıq dirəkləri aşsa da, uzun müddət təmir edilmir və ya dəyişdirilmir. Bu da həm estetik problemlər yaradır, həm də təhlükəli şəraitə səbəb olur. Yaxud bəzi küçələrdə işıq dirəkləri ya düzgün yerlərdə yerləşdirilməyib, ya da sayca yetərsizdir. Bu, küçələrin bərabər işıqlandırılmasına mane olur və müəyyən ərazilərin tam qaranlıq qalması ilə nəticələnir. Təbii ki, bu problemlər şəhər sakinləri arasında narazılıq yaradır və müvafiq qurumlardan daha operativ şəkildə tədbir görülməsi tələb edilir. Oxşar problemlərdən biri ötən gün Böyükşor-Pirşağı yolunda baş verib. Yeni çəkilmiş yolda quraşdırılan işıq dirəkləri gecə saatlarına rəğmən, necə deyərlər, müvafiq işini yerinə yetirməyib və nəticədə bəzi vətəndaşlar təhlükə ilə üzləşiblər.

Bununla bağlı Sfera.az-a açıqlama verən nəqliyyat məsələləri üzrə ekspert Aslan Əsədov deyib ki, bir ərazidə ümumi olaraq nəqliyyat vasitələrinin istismarı üçün hər hansı bir şəraitin yaradılmasına ilk növbədə işıqlanma, yol infrastrukturunun qurulması, həmin ərazidə olan vətəndaşların və ərazidə xidmət göstərəcək iaşə obyektlərinin yol boyu işıqlandırılması və.s daxildir:

“Bu, hər hansı bir hərəkətin təhlükəsizliyi üçün də bir stimul verir. Yəni bu cür texniki göstəricilərin təmin edilməsi həm də vergilərin ödənilməsi, həmin obyektlərin işləməsi və obyekt üzrə vergilərin vaxtında yığılması kimi məsələlərə də təsir edir, dövlət gəlirlərinə, büdcəsinə fayda verir.Ona görə də bu işlərin xüsusi olaraq nəzarətdə saxlanması vacibdir. Ola bilər ki, dirəklərin işıqları sönər, işlək vəziyyətdə olmaz, bu kimi hallar bu və ya digər formada diqqətdə saxlanılmalı, ümumiyyətlə, hərəkətin təşkilinə və təhlükəsizliyinə xüsusi önəm verilməlidir”.

Bəs paytaxt yollarında işıq dirəklərinin ümumi vəziyyətinə hansı qurumlar cavabdehdir?

Bakı küçələrində işıq dirəkləri və ümumi işıqlandırma sistemlərinə nəzarət edən əsas qurum “Bakı Şəhər İşığı” Elektrik Şəbəkələri Müəssisəsi və Bakı Şəhər İcra Hakimiyyətidir. Bu qurumlar işıq dirəklərinin quraşdırılması, təmiri və texniki baxışını həyata keçirməlidirlər. Belə ki, “Bakı Şəhər İşığı” Elektrik Şəbəkələri Müəssisəsi şəhərin işıqlandırma sisteminə texniki nəzarət edir. Onların məsuliyyətinə qəzaya uğramış və ya işləksiz olan dirəklərin təmiri, köhnəlmiş sistemlərin yenilənməsi və yeni işıq dirəklərinin quraşdırılması daxildir. Bu qurum həmçinin işıq dirəklərinin təhlükəsizliyini təmin etməlidir, xüsusən də elektrik naqillərinin təhlükəsiz şəkildə quraşdırılması və açıq naqillərin aradan qaldırılması ilə məşğul olmalıdırlar.

Bakı Şəhər İcra Hakimiyyəti isə şəhərin ümumi abadlıq işlərinə cavabdeh olan qurumdur, şəhər işıqlandırmasının düzgün işləməsinə və vətəndaşların təhlükəsizliyinin təmin edilməsinə nəzarət etməlidir. Həmçinin müvafiq işıqlandırma sistemlərinin modernləşdirilməsi və şəhərin müxtəlif ərazilərində bərabər şəkildə işıqlandırılmasını təşkil etmək onların məsuliyyətinə daxildir. Elektrik enerjisi təchizatına cavabdeh olan qurum isə "Azərişıq" ASC-dir. Bu qurum da bəzi hallarda işıq dirəklərinin elektrik təchizatına nəzarət edir. Onlar enerji təchizatında baş verən problemləri həll etmək üçün "Bakı Şəhər İşığı" ilə əməkdaşlıq edirlər. Bu məsələyə nəzarət edən qurumlar işıq dirəkləri ilə bağlı problemləri həll etməklə yanaşı, vətəndaşların şikayətlərinə də diqqət yetirməlidirlər. Şikayət və müraciətlər əsasında operativ təmir işləri aparmalıdırlar.

Cavabdeh qurumlar niyə bu məsələlərə nəzarət etmir?

Qeyd edək ki, gecə vaxtı işıq dirəklərinin işləməməsi, xüsusilə yağışlı və qaranlıq hava şəraitində, ciddi təhlükəsizlik və nəqliyyat problemlərinə səbəb ola bilər. Bu vəziyyətin aidiyyəti qurumların məsuliyyət sahəsinə aid olması, həm şəhər sakinlərinin təhlükəsizliyini təmin etmək, həm də şəhərin infrastrukturunu qorumaq baxımından vacibdir. İşıq dirəklərinin texniki baxımını və təmirini həyata keçirmək Bakı Şəhər İcra Hakimiyyəti və ona tabe olan kommunal xidmətlərdən birbaşa məsuliyyət tələb edir. Müntəzəm olaraq işıqlandırma sistemlərinin yoxlanılması və nasaz olan dirəklərin bərpa edilməsi onların əsas vəzifələridir.

Gecə vaxtı küçə işıqlarının işləməməsi sürücülərin görünüş məsafəsini azaldır və yol qəzası riskini artırır. Xüsusilə yağışlı günlərdə su yığıntıları və sürüşkən yollar da əlavə təhlükələr yaradır. Kifayət qədər işıqlandırılmayan ərazilərdə cinayət riski də artır. Qaranlıq küçələrdə təhlükəsizlik hissi azaldığı üçün, bu, oğurluq, qarət kimi cinayətlər üçün münbit şərait yarada bilər. Məhz bu səbəblərə görə, aidiyyəti qurumlar işıq dirəklərinin mütəmadi texniki baxımını həyata keçirməli və xüsusilə yağışlı günlərdə qısa müddət ərzində problemləri həll etmək üçün operativ tədbirlər görməlidir.

Nəzərə almaq lazımdır ki, ölkə başçısı şəhər infrastrukturunun, o cümlədən işıqlandırma sistemlərinin müasirləşdirilməsi və şəhər sakinlərinin təhlükəsizliyinin təmin edilməsi məsələlərinə xüsusi önəm verir.Müxtəlif vaxtlarda Bakı və digər iri şəhərlərdə işıqlandırma və nəqliyyat təhlükəsizliyinə aid layihələrin inkişaf etdirilməsi ilə bağlı da bir neçə tapşırıq verilib. Prezident tərəfindən verilən tapşırıqlar arasında şəhər infrastrukturunun modernləşdirilməsi xüsusi yer tutur. Bu çərçivədə işıqlandırma sistemlərinin yenilənməsi də ön plandadır. İşıq dirəklərinin müasir texnologiyalarla təchiz olunması və avtomatlaşdırılmış nəzarət sistemlərinin quraşdırılması dövlət proqramlarının bir hissəsidir. Ölkə başçısı tərəfindən “Təhlükəsiz Şəhər” proqramının genişləndirilməsi ilə bağlı tapşırıqlar da verilib. Bu proqram çərçivəsində küçə işıqlandırma sistemlərinin təkmilləşdirilməsi, xüsusi hallarda, məsələn, yağışlı və qaranlıq günlərdə piyadaların və nəqliyyat vasitələrinin təhlükəsizliyini artırmaq üçün tədbirlər görülməlidir.

Prezidentin tapşırıqları arasında qəza hallarında və təcili vəziyyətlərdə kommunal xidmətlərin operativ tədbirlər görməsi xüsusi vurğulanır. İşıqlandırma ilə bağlı problemlərin dərhal həll edilməsi və bu halların minimuma endirilməsi üzrə tədbirlər görülməlidir. Bu, həm sürücülərin, həm də piyadaların təhlükəsizliyinin təmin olunması üçün vacibdir.

Beləliklə, aidiyyəti qurumlar, xüsusilə Bakı Şəhər İcra Hakimiyyəti paytaxt yollarında bəzi işıq dirəklərinin niyə işlək vəziyyətdə olmadığı ilə bağlı suallara aydınlıq gətirməli, öz məsuliyyətini dərk etməlidir. Əks halda, onsuz da artan qəzaların böyük təhlükələrə yol açmasının şahidi olacağıq.

Türkan

Bakının işıqsız qalan "işıq" dirəkləri... - Məsul qurumlar niyə məsuliyyətsizlik edir?